Shillong, Rymphang 13 : Ka ophis jong ka District Magistrate East Khasi Hills District ka la pynmih ïa ka jingmaham ba la mana ban pynlong ïa kino kino ki jingpynïatur ïa ki masi lane kino kino ki jingpynïakhun da ki mrad ha baroh kawei ka distrik jong ka East Khasi Hills.
Ha ka jingmaham ba la pynmih ha ka sngi Palei, la ong ruh ba ka ophis ka la ïoh jingtip ba ka don ka jingpynïatur masi kaba khah khah bha khamtam haba don ki jingpynlong fete ne kiwei ki tamasa ha ki katto katne ki bynta jong ka East Khasi Hills.
La kdew ruh ba lada ailad ïa kane ka jingpynïatur masi lane ka jingïapynïakhun da ki mrad, kan long kumba pynkhein ïa ka kyndon Section ba 11 jong ka Prevention of Cruelty to Animals Act, 1960. La ong ruh ba kan long pyrshah ruh wat ïa ka hukum jong ka Supreme Court jong ka Ri kaba la ai ïa ka rai ha u snem 2014.
Kumta, la ong ba katkum ka bor ba la pynkup ha ka Section 163 BNSS, ka District Magistrate Kong RM Kurbah, IAS ka la maham tyngeh bad mana ïa kum kitei ki jingïapynïatur masi bad kiwei kiwei ki jingpynïakhun da ki mrad ha baroh kawei ka distrik.
La maham ruh ba kino kino kiba pynkhein ïa kane ka jingmaham kin ngat ha ki kyndon jong ka ain kaban treikam naduh ka 10tarik Rymphang tad haduh ban da pynbna da kumwei pat.
