Nongpoh, Jymmang 20: Ka Seiñ Kur Suchiang, Ri-Bhoi Unit kala pynpaw ka jingsngewkhia kaba jur halor ka jingleh jong uwei u rangbah bala tip kyrteng kum u Phermandes Mawsymbai u ba shong ba sah ha Mawroh u la nud ban pynïaid da ka Football Tournament haka kyrteng jong ka Seng Samla Kur Suchiang.
Haba kren sha ki lad pathai khubor mynta ka sngi u Henry Suchiang Secretary ka Seiñ Kur Suchiang Ri-Bhoi Unit bad ka kong Ibrosta Suchiang President ka Nongpoh Unit kila pynpaw ba kum ka kur ka dap da ka jingsngewlyngngoh kaba khraw bad ka jingkyndit ban ioh jingtip ba kawei ka Football Tournament kaba la pynlong haka shnong Saiden bala pynïaid da u Bah Phermandes Mawsymbai u ba la shim ha kyrteng jong ka kur da kaba pynbna ruh da ka khusnam kaba 15 hajar.
Naka liang kitei ki nongïalam ka Seiñ Kur Suchiang kila pyntip ba kim don jingtip eiei halor katei ka jingleh jong utei u rangbah u bym don ruh kano kano ka jingïadei bad ka kur Suchiang, hynrei naka liang jong ki kila buh jingkylli ba kumno u nud ban pynlong kat ka Football Tournament ha kyrteng jong ka kur khlem ka jingtip jong ka kur.
“Kane ka jingleh jong utei u rangbah kam dei shuh ka sien ba nyngkong hynrei u ba la shu kwah kamai pisa jubor ha kyrteng jong ka kur bad naka liang ka kur ka pan map ruh naki riew paidbah lada don kino kino kiba la noh synñiang sha utei u rangbah naka liang ka kur kala pynshai ba kam don jingtip eiei halor katei ka bynta” la ong kitei ki nongïalam kur bad ai por ruh ïa utei u briew 1 taiew ban pynshai halor katei ka jingpynlong ïaka tournament ha kyrteng ka kur bad lada um lah ban pynshai naka liang ka kur kan sa shim pat da kiwei ki sienjam ba tyngeh halor ka jingpynjah burom ïaka kur.
