Shillong, Jymmang 20: Ka Mawlai bad ka Laitkor ki la rung sha ka semi-final jong ka lympung ïalehkai Women’s Football League ba pynïaid da ka Shillong Sports Association hadien ba ki la khur jingjop ha ki jingïalehkai ba khatduh ha ka sngi Thohdieng kaba la long ha madan Third Ground, Polo, Shillong.
Baroh ar tylli ki team ki la ïoh ban rung sha ka semi-final na ka Group A bad haba phai sha ka jingïalehkai ha kane ka sngi, ka Mawlai SC ka la pynliem kput da 7-0 ïa ka Rahjingshai ha ka jingïakhun kaba nyngkong katba ka Laitkor ka la rung sha ka semi-final hadien ba ka pynliem da 3-0 ïa ka PFR Academy ha ka jingïalehkai kaba ar.
Ka Mawlai SC ka la lah ban teh lakam bha ha ka rukom bat bad pashat bol bad tang ha ka minit ba phra ka la ïoh ban pynkhih jar lyngba ka Ibashisha Khongwet, bad tang hadien lai minit ka Rushia Dkhar ka la thep ïa ka kol kaba ar (11min).
Ka Mawlai SC ka la nang ïakhun tyngeh khlem da ailad ïa ki thei ka Rahjingshai bad da kane ka rukom ïalehkai ha ka minit ba 17 ka Marbarin Nongrum ka la thep ïa ka kol kaba lai shwa ba kan thep pat ïa ka kol kaba ar na bynta jong ka bad kaba saw ïa ka Mawlai SC ha ka minit ba 19.
Ka Mawlai ka la nang ïoh mynsiem shuh shuh bad ki saw kol ba ka la thep kam pat shym la pynhun ïa ka kynhun ha kaba ka Ibashisha Khongwet ka la thep ïa ka kol kaba san bad kaba ar na bynta jong ka ha ka minit ba 43, shwa ba ka Sunalinda Iawren kan thep ïa ka kol kaba hynriew ha ka minit ba 45 bad khatduh ka Fedelia Lamare ka la ïarap thep kol ha ka minit ba 49 ha kaba ka kynhun ka la pynliem syndon da 7-0.
Haba phaia pat sha ka jingïakhun hapdeng ka Laitkor bad PFR Academy, ka jingïakhun ka long kaba mar ïakhaid ha kaba sdang jong ka kylla step, hynrei ha ka minit ba 20 ka Solina Jaba ka la thep jlang ïa ka shi kol na bynta ka Laitkor kaba la pynkmen ïa ka kynhun hi baroh kawei.
Ka jingïapyrshang thep kol shwa ban kut ka kylla step ka ïathnem bha baroh ar liang hynrei ym don ba lah ban thep kol kaba pynlong ïa ka Laitkor ban lamkhmat da 1-0.
Ha ka kylla miet mar syn sdang hi ka Tracy Rympei ka la khyrwit bad thep kol na bynta ka Laikor SC ha ka minit ba 46 bad khatduh eh ka la thep ïa ka kol kaba ar ha ka minit ba 60. Kumta haduh kaba kut jong ka jingïalehkai ka Laitkor SC ka la pynliem da 3-0 bad rung syndon sha ka semi-final.
Ka jingïalehkai mynta ka sngi Saitjaiñ na ka Group B kan long hapdeng ka Nongkohlew pyrshah ïa ka Lawei ha ka jingïakhun kaba nyngkong kaban long ha ka por 1 baje nohphai sngi katba ha ka jingïakhun kaba ar ka Nongkrem pyrshah ïa ka Lumaparing ha ka por 3:30 baje janmiet.
Na kane ka Group ka Maw-U-Tieng ka la ïoh ban rung lypa sha ka semi-final, katba ka jingïaknieh rung kan long hapdeng ka Lawei kaba don mynta ha ka kyrdan ba ar da phra point bad ka Lumparing kaba don ha ka kyrdan kaba lai da hynriew point.
