Nongpoh, Naiwieng 05: Ka Ribhoi Dorbar ka la pynpaw ïa ka jingsngewkhia ba ka Ribhoi Dorbar ka la don mynta ha ka kyrdan kaba lai halor ka jingkynrei jong ki nongdih drok bad ka jingkiew rasong jong ki kam khaii drok.
Kum u nongaibuit jong ka Ri Bhoi Dorbar u Bah R.R Kynsai Makdoh haba kren ha kawei ka jingïalang pynskhem ïa ki nongïalam bathymmai jong ka Ri Bhoi Peoples’ Council (RBPC) kaba long ha ka sngi Saitjaiñ ha District Library Auditorium Hall, Nongpoh u la pynpaw ïa ka mynsiem ba sngewkhia halor ka jingkynrei ki kam khaïi drok bad ka jingdih drok, ha kaba ka Ri Bhoi ka la wan ha ka kyrdan kabalai halor ka jingbun ki nongdih drok bad ki kam khaïi drok hapoh ka jylla.
U Bah Makdoh, u la pynpaw ruh ïa ka mynsiem ba sngewkhia halor ka jingngop jong ki samla bad kiba la shah pynjot ha ki tyrsim ba shyrkhei jong u drok.
U la ong ba ka long ka jinglehraiñ ïa ka district bad ka jylla hi baroh kawei ba ka jingkynrei u drok ha ka jylla ka la pynjot ïa kiba bun ki khun samla baluilui bad u la ong ruh katkum ka jingïoh lum jingtip kaba kham sngewkhia ka long ba ka Ri Bhoi District ruh ka la rung ha ka kyrdan kaba lai ba la bun ki nongdih drok bad kiba khaïi beaiñ ïa u Drok.
Haba ai mynsiem ïa ki nongïalam ba thymmai jong ka Ri Bhoi Peoples’ Council (RBPC), u Bah Makdoh, u la ban khia ïa kane ka kynhun ba kan shimkhia ban ïakhun thma pyrshah na ka bynta ban pynduhjait ïa ka jingkynrei jong ki nongdih drok bad ruh ki kam khaïi drok, nalor kiwei kiwei ki kam ba ki shakri ban kyntiew na ka bynta ka bha ka miat jong ki paidbah hapoh ka them Ri Bhoi.
U la bynrap ruh da kaba ong, “ka ladei ka por ba kin don kita ki nongïalam kiba don ka jingkitkhlieh ban ïakhun pyrshah ïa kane ka jingsniew kaba la ktah bha ïa ki khun samla ka district bad ka jylla bad lada ym don kita ki samla kiba ïohi jngai bad kiba shlur ban ïakhun pyrshah ïa kane ka jingkynrei ki nongdih drok bad ki kam khaïi drok ka long ka jingma kaba khraw ïa ka pateng ka jaidbynriew namar shisien ba ki khun samla ki la ngop ha u drok bad kiwei kiwei ki jaid jingsniew kan long ka pateng kaba duk na ka bynta ka ri bad ka jaid bynriew.
Kum ka jingai mynsiem ïa ki nongïalam ka RBPC, u Bah Makdoh u la ai kyntu ba kin ïakhun pyrshah ïa kane ka jingkynrei jong u drok bad kiwei kiwei ki kam sniew bad lada ki samla ki don kata ka jingkitkhlieh ban pynduhjaid ïa ki kam sniew ka jingkyrmen kan wan ha ka jaidbynriew ba kan dang kiew shaphrang ha baroh ki liang la ha la ïing la sem, ha shnong ha thaw bad ha ka jylla hi baroh kawei.
