Khliehriat iaiong 23: Ka Hynñiewtrep Youth Council East Jaiñtia Hills District ka pynpaw ka jingsngew khia kaba khraw halor ka jingsahdien ki shnong kiba don ha ka thaiñ Saipung bad ka seng ka buh ka jingkylli ba kane ka jingsahdien ka thaiñ hato ka dei namar ka ka jingbym don ka jingkitkhlieh ki bor syndhar district ne ka jing bym ler treikam ki nongmih khmat ne ka jingbym shim khia lem ka sorkar ne? namar katei ka thaiñ ka mad jingeh ha baroh ki liang.
Ka jingbym bit bym biang ki surok, ki lynti syngkien ka buh jingeh haduh katta katta ïa ki paidbah ha ka leit ka wan khamtam eh ka shnong Saibul, Thuruk, Moulsei, Molian bad kiwei kiwei de ki shnong kiba don ha ka thaiñ Saipung, ki khynnah skul bad ki nonghikai ki hap ban iaid na ka jyrsieh ba dap da ka khyndew bad ka ktieh ban poi sha skul, kumjuh ruh namar ka jingjyrsieh bun ki kali ki sahkut ha ka jyrsieh kane ka buh jingeh ïa ka leit ka wan, ka kit ka bah bad khamtam kiba pang ba shitom, ka seng ka la sakhi da la ki khmat ïa kine ki jingeh jong ki paidbah bad kumjuh ruh lyngba ki pathai khubor (Social media) ym tang katta ka seng ka pynpaw ruh ba na ka daw ka jingbym bit bym biang ka surok ka wanrah ïa ka jingsahdien ha ka roi ka par, kumjuh ruh ha ka pule puthi.
Ka seng ka dawa jur na ki bor synshar district jong ka East Jaiñtia Hills District, dawa ruh na ki nongmihkhmat bad na ka sorkar ba ki dei ban shim khia noh kloi ban maramot ïa ka surok ha ki shnong kiba don ha ka thaiñ Saipung khnang ban dup lah ban wanrah ïa ka bha ka miat, ka roi ka par ha ka thain.
