Jowai, Jymmang 23: Ka sorkar jylla lyngba ka skhim FOCUS (Farmer Collectiviza-tion for Upscaling Production and Market System) mynta ka sngi 23 tarik ha ryngkat ka jingïatreilang bad Meghalaya Basin Management Agency (MBMA), ka Chan Kylliang Development Society bad ka Enterprise Facilitation Center kila pynlong ïa ka prokram phylliew jingmut lang bad ki kynhun nongrep ka Laskeiñ C&RD Block ha madan Pamsna.
Ha kane ka sngi na ka liang u MLA ka Mowkaiaw Constituency u ma Nujorki Sungoh ula long kum u kongsan uba la sam ïa katei ka jingïarap pisa da ka Cheque kaba la kot haduh T.1,19,45,000 sha ki 193 tylli ki kynhun (Producers Group) jong katei ka thaiñ kiba don ha ki lai bynta jong ka kam rep kata ïa ka kam rep Sying, pynmih Shynrai bad ka kam ri Sniang.
Kiwei de kiba ai jingkren ki kynthup ïa u BDO ka Laskeiñ ma Dr. Brightstar Langbang, ma Chanky Lyngdoh ka CKDS, kong R. Lamare ka Agriculture Development Officer Laskeiñ Block, u Dr. D. Tariang na ka tnad Veterinary bad ka kong R. Rngad Horticulture Development Officer, kumjuh naki ar ngut ki nongrep ka kong Melinda Dhar na Lummuriap bad u ma Niphas Biam na Mooshrot.
Kitei ki nongkren kila pynsngew ïa ka rukom treikam jong ki kynhun Producers Group da kaba pynbiang ïa ki lai tylli ki kot donkam ban pynïaid ïa ka kam jong ki kata ka copy ban thoh rai, ka Cashbook bad ka kot loan.
La batia ruh shaphang ka rukom pynïaid ïew ïa u Shynrai Lakadong uba la paw bha mynta na ka jingbha jong ka jingdon ha u ïa ka Curcumin, la ai jinghikai ïa ki nongrep kim dei ban pynbun ïa ka dawai ha ka khyndew bad ïaleh katba lah ban pyndonkam da ka sboh mariang khnang ba ka kyndew kan im pateng la pateng.
La ai jingtip ruh sha kitei ki nongrep jong ka Laskeiñ Block shaphang ka lad jingïarap na ka PM-Kisan kaba lah ban ai haduh 6 hajar tyngka ha ka shisnem na ka bynta ban thied ïa ki dawai dashim bad ïa kane ki nongrep ki lah ban tip kham bniah da kaba leit mih sha ki ophis ka rep ka riang.
Shuh shuh la ai jingbatai shaphang ka rukom ri Sniang namar kumba long mynta ka jylla ka dang shañiah na shabar ban pyndap ïa ka doh, ha kaba ka sorkar mynta kaba wanrah ïa ka skim ri sniang ba heh ne ka ‘Meghalaya Piggery Mission’, la batia ruh shaphang ka rukom ri ïa ki sniang, ka rukom bam, ka jingleh khuid bad ka rukom ai dawai bad tika ïa ki sniang.
La kyntu jur ïa ki nongrep ka thiañ ba kim dei ban long tang kum ki nongrep hynrei ha ka juh ka por ki dei ban long ruh ki nongseng kam seng jam khnang ban pynkiew shuh shuh ïa ka ïoh ka kot jong ka jylla hi baroh kawei. Ha kaba ïadei bad ki skim ba la ai da ka sorkar sha ki nongrep la kyntu ba kin pyndonkam hok ïa ki.
U kongsan ma Nujorki Sungoh haba ai jingkren ula ong ba ka sorkar kala pynshang ban wad ki lad ki lynti ban pynkiew ïa ka rep ka riang hapoh ka jylla, ula ong ruh ba ka sorkar kala dep ban plie ïa ka Mission Lakadong, ka Milk Mission bad ka Piggery Mission, ha ka juh ka por u pynpaw ka jingsngewkmen ba kane ka thaiñ kala ïoh ka jingïaroh hakhmat jong ka pyrthei na u Shynrai Lakadong.
Ula ong ruh ba ïa ka tnad Agriculture bad Veterinary dei ban buh hakhmat eh khnang ba kin ïarap ban pynkiew ïa ka imlang ka sahlang.
