Khliehriat iaiong 23: Ki dkhot jong ka East Jaiñtia National Council Samasi Circle, mynta ka sngi ki la leit ban maramot hi ïa ka jingkieng Rimanar kaba don hapoh elaka Sumer namar kane ka jingkieng ka la julor bad ha kajuh ka por ruh kane ka jingkieng ka la sdang ban tor bad buh jingma, la kynnoh ruh ba ka jingtor bad jingjulor ka jingkieng ka dei namar ka jingkit palat pud ki trok kiba kit jingkit kiba iaid lyngba na katei ka jingkieng.
Kane ka jingkieng Rimanar ka dei ka jingkieng kaba ki ju iaid lyngba ki paidbah jong kiba bun ki shnong kiba don ha katei ka thaiñ Sumer elaka, ha kane ka jing maramot ba la lam khmat da u u President EJNC Samasi Circle, u bah Sakilan Chyrmang, u Genl Secretary , u bah Seibor Tangliang la ïa don ryngkat lang ruh u Ma Kynmo Chyrmang , uba dei u Rangbah Shnong jong ka shnong Samasi.
“Ka jingiaid jong ki kali kiba kit palat pud (overload) na kane ka jingkieng Rimanar kalah ban buh hapdeng ka jingma kaba khraw ïa kane ka jingkieng nad lada kine ki kali ki ba kit palat ia ka 9mt kin dang bteng ban iaid lyngba na kane ka jingkieng khlem pep kan sa poi ka por ba kane ka jingkieng kan julor jur ne kan sa duh noh bad lada kane ka jingkieng ka julor kan long ruh ka jing duhnong kaba khraw iaki nongshong shnong jong kane ka thaiñ namar kane ka jingkieñg kadei u budlum jong ka Elaka Sumer hi baroh kawei” ong u kyrwoh na ka seng.
Kumta khnang ban iada ïa ka jingkieng Rimanar ban lait na ka jingjulor jing pait jingpra ka jingkieng, ka seng ka maham bad khang pyrshah ïa ki kali kiba kit palat pud ban iaid lyngba na kane ka jingkieng bad maham ruh ba lada ka seng ka lap ïa kino kino ki kali kiba kit palat pud kiba iaid lyngba na kane ka jing kieng, na ka liang ka seng kan pynshitom ïa ki da kaba tyngeh.
Ha kajuh ka por ka seng ka kyntu ïa ka tnat P.W.D ba ka dei ban shim khia ban maramot noh ïa katei ka jingkieng kaba don mynta ha ka jingma.
