Khliehriat iaiong 20: Ka Khasi Students Union South West Border Circle, ka pynpaw ïa ka jing sngewkhia kaba jur halor ka jingkylla rong biang jong ka wah Wah-Prang kaba don ha khappud ha East Jaiñtia Hills District bad ong ba kane ka jingkylla rong ka um ha ka wah Prang ka dang jia biang ha kine ki khyndiat sngi bad kane ka ju jia man ka por, khamtam ha ka por ba slap, ka seng ka kynnoh ba kane ka lah ban don ka jingjaboh ne ka jingpyllait jaboh kaba pyntuid sha kane ka wah.
“Kane ka jinglong ka jingman ka wah Prang ka wanrah ka jingma kaba jur ïa ka jingim jong kiba im hapoh kane ka wah ba kynthup ki dohkha, ki doh um namar bun ki dohkha kiba im ha kane ka wah ki la iap na kane ka jing kylla rong kynsan kane ka wah. Nangta ruh, ka koit ka khiah jong ki paidbah ba sah sha kane ka thaiñ ba don ka wah Prang ka don ha ka jingma, namar bun ki briew ki pyndonkam ïa ka um na kane ka wah bad bam ïa ki dohkha na kane ka wah, ka jingbam ïa ki dohkha na kane ka um kaba la jaboh ka lah ban buh jingma ïa ka koit ka khiah jong ki briew ka thaiñ”ong u kyrwoh.
Ka KSU South West Border Circle ka dawa jur ïa ki bor ba dei peit, khamtam ïa ka Meghalaya State Pollution Control Board (MSPCB), ba kin leh mardor ïa ka jingtohkit kaba bniah halor kane ka jingjia kaba ju jia man ka por bad dei ruh ban lap ïa ka daw tynrai jong ka jingjaboh kane ka wah Prang bad lada lap ka tnat ka dei ban shim ïa ki sienjam kiba tyngeh pyrshah ïa kiba donkti.
“Ngi dawa ruh ïa ka sorkar ba kan shim mardor ïa ki sienjam kiba donkam ban khanglad ïa ka jingpynjaboh ïa kane ka wah bad ban pynphai biang ïa kane ka wah sha ka jinglong jingman kaba shngain bad ba khuid. Ka KSU South West Border Circle kan bteng ban buddien ïa kane ka jingjia bad ban shim ïa ki sienjam kiba kham tyngeh lada ym shimkhia mardor da ki bor ba dei peit” pynkut u kyrwoh.
