Ka State BJP ka khlem tyrwa ticket sha u Bah DP Wahlang, dei ka jingkren shimet u Bah Hek, ong ka BJP

Shillong, Ïaïong 20: Ka State BJP ka la kren da kaba shai ba ka jingkren ba la pynpaw da u Bah A L Hek halor ka jingtyrwa ban ai ticket sha u Bah D P Wahlang, uba dei u Chief Secretary barim ka jylla, ka dei ka jingkren ba shimet jong u bad kam shym la dei satia ka rai kaba la shim da ka party.
Ka State BJP ha ka kyrwoh khubor ka la ong ba kam shym la don kano kano ka jingïakren ïasyllok hapdeng ki nongïalam ba la rim bha jong ka BJP Meghalaya. Ka la ong ba ka BJP ka dei kaba don da ki kyndon bad ka seng kaba don la ka nongrim.
Ka BJP ka la pynpaw ruh ba ka jingai ïa ka ticket jong ka party na ka bynta ban ïakhun ïa kano kano ka elekshon ka long kaba kongsan ban hap bud ïa ki rukom treikam kiba la buh da ka central steering group jong ka party. Tang ka central parliamentary board ka don ïa ka bor ban jied ïa ki kyrtong na ka bynta ki elekshon MP lane MLA; bad kane ruh kan long tang hadien ba la dep ban pynbna ïa ki tarik.
Na ka liang ka State BJP ka la pynshai ruh ba la hangno hangno ba la pynbna ban pynlong elekshon, la ka long ha ka state Legislative Assembly ne ka Parliamentary, ka party ka khot ïa ki application na ki dkhot jong ka party kiba sngewbha ban long ki kyrtong bad ïa ki kyrteng jong baroh kiba pan tiket la mynjur da ka state election committee bad phah sha ka central parliamentary board. Kumta halor kane na ka liang ka board ka jied ïa ki kyrtong kiba biang tam bad kiba don ka jingkyrmen na ka thup jong kiba thep kyrteng.
Kano kano ka jingïakren ban ai tiket sha kino kino ki briew kam shym la mih hapoh ka party lada khlem bud ïa ki kyndon ne ki rukom treikam, khamtam hapoh ka party kum ka BJP, ong ka kyrwoh na ka State BJP.