Pynkup burom ki Nonghikai ïa u CM ha Tura kmen ban ïoh tulop thymmai palat 23 hajar ngut

Tura, Iaiong 20 : Ka All Meghalaya 4th Teachers’ Association, Garo Hills unit, ka la pynkup burom ïa u Myntri Rangbah ka Jylla Conrad K Sangma ha ka Lah Sngi U Blei haba ai jingithuh ïa ka jingwanrah ka Sorkar ïa ka tulop ba la pynbeit ryntih.
Kane ka jingïalang ba la pynlong ha District Auditorium, Tura ha West Garo Hills, ka pyni ïa ka jingktah jong kane ka jingsiew tulop ba thymmai kaba thmu ban pynthikna ïa ka jingsiew tulop kaba shai bad ha ka por kaba biang haba weng noh ruh ïa ki jingeh ba ïadei bad ka jingsiew tulop bad ka jingshakri ki nonghikai. Haba ai jingkren ha ka jingïalang, u Conrad ula shim ïa kane ka jingpynkup burom kum ka jingïalang kaba “kham niar eh ban jia” haba pynpaw ba ki nongmihkhmat paidbah kim ju kham ïoh ïa ka jingithuh na ka bynta ki kam ba ki trei. Ula ai ka burom ïa ka jingïoh ïakren jong u bad ki Nonghikai ha ka por ba u dang long kum u MP ban pynwandur ïa ka jingsngewthuh ïa ka jingeh hapoh ka kam pule puthi.
U Myntri Rangbah ula ong ba palat 23000 ngut ki nonghikai ha kylleng ka Jylla Meghalaya kin ïoh ïa kane ka jingmyntoi na ka rai ba dang shen jong ka Sorkar, kynthup kiba hikai ha ki skul SSA, Adhoc, Hindi Grant, Science Grant bad Fourth Teacher. Ula banjur ba ka long kaba eh hynrei ka rai kaba donkam la shim ban wanrah ïa ka jingkylla kaba la pynbeit ryntih bad ai ïa ka jingsiew ka ban pynmyntoi ia ki nonghikai.
U Conrad ula pynpaw ruh ba ha ka por ba ka Sorkar jong u ka shimti ïa ka Ophis ha u 2018, ka kam pule puthi kam don satia ïa ka lynti ïaid kaba shai. Ula kdew ïa ka jingthaw ïa ka Education Policy bad ka jingpynkha ïa ka Education Commission kum ka sienjam ba donkam ha ka ban weng ïa ki jingduna ha ki jingtei, ka bha ka miat ki nonghikai, ki jingai jinghikai bad ka jingpynrung lang ïa ki technology.
Kiwei pat kiba la ai jingkren ki kynthup ïa u Myntri ka tnad Pule Puthi Bah Lahkmen Rymbui bad kiwei kiwei.