Shillong, Nohprah 15: U Symbud Myntri Rangbah ka Jylla Bah u Prestone Tynsong ula kyntu ïa ki paidbah ka jylla ba kin ïai shah shipor na ka jingmaramot ïa ka Jingkieng Damsite bad ka Sorkar kan pynthikna katba lah ban lah pyndep ïa kane ka jingtei hapoh ka 4 bnai.
“Ngi dang shah mynta ia ki kali kiba rit ba kin ïaid na katei ka jingkieng hynrei ïa kaba ngim shah, ka dei ïa ki kali heh bad ki kali kamai kiba heh ba kin ïaid bad kumta kin hap ban ïaid noh na ka surok Bypass” ong u Bah Prestone Tynsong.
U Bah Prestone ula ong, “La kumno kumno ruh ka Kompani kan shim por 3 bnai ban pyndep ïa katei ka kam bad mynta kila sdang ïa ka kam bad kin ïaleh ban pyndep kloi hashwa ban slap. Ngi la bthah bad kin leh kloi ïa ka kam bad ka sorkar ka la buh ruh ïa ka kynhun kaba kyrpang na ka MeECL”.
Ula ong, ka MeECL kan peit ba kane ka jingtrei ka dei ban ïaid shakhmat khlem sangeh bad ban pyndep ha ka por kaba la buh khnang ba kan ym pynthud ïa ka ïaid ka ïeng jong ki paidbah, khamtam eh ïa ka jingkit ia ki tiar ki tar bad ki marbam mardih kaba lah ban kham rem namar kin hap ban leit ïaid kylleng kylleng ban wan sha Shillong.
Ula kyntu ïa ki paidbah ba kin long kiba ïai shah shipor ïa kane ka jingeh ba ki ïakynduh mynta.
