Nongpoh, Jymmang 22: Sa tang khyndiat sngi shuwa ba un mih na kane ka district ban leit shimti pat kum u Deputy Commissioner ka East Khasi Hills District u Abhilash Baranwal Deputy Commissioner ka Ri Bhoi District mynta ka sngi u la aiti daka Ambulance sha ka Synjuk ki Rangbah Shnong Ri Bhoi District.
Ïa kane ka Ambulance la pynlait paidbah mynta ka sngi da u Abhilash Baranwal haka jingïalang bala pynlong ha Circuit House Nongpoh ha ka jingdonlang ki nongïalang ka Synjuk naduh u Bah BB Makdoh Chairman, Bah P B Sylliang Secretary lem bad kiwei kiwei ki nongïalam shnong.
Na ka liang u DC u la ong ba kane ka dei ka jingkyrpad kaba la slem jong ka Synjuk hynrei mynta ka kynti la ioh ban pynmang pisa bad ban aiti syndon ïa katei ka Ambulance sha ka Synjuk ki Rangbah Shnong ban ai ka jingshakri sha ki paidbah haka liang ka koit ka khiah bad naka liang u DC u la ai ka jingïaroh kaba khraw ïaka rukom treikam jong ka Synjuk naka bynta ka them Ri Bhoi baroh kawei bad lyngba kane ka kali kan dang ioh ban shakri shuh shuh sha ki paidbah ha kaba ïadei bad ka koit ka khiah.
U Bah PB Sylliang Secretary ka Synjuk haba kren ha kane ka sngi u la ong ba kane ka dei ka jingangnud kaba la slem jong ka Synjuk hynrei mynta ka sngi kane kala urlong shuwa ba u DC un mih na kane ka district bad kum ka synjuk kam lah khlem da pyrto bad ïaroh ïaki kam kiba u Abhilash Baranwal u la leh haka them Ri-Bhoi bad bun naki paidbah ki ïaroh bad ioh jingïeid khamtam ha kaba ïadei bad ki Dorbar Shnong.
Kum ka Synjuk ka kitbok ïa u Abhilash Baranwal bad ka iing ka sem ba u Blei un don ryngkat bad ka iing ka sem baroh kawei bad ka Synjuk ka sngewnguh shi katdei ïa kane ka jingshimkhia jong u DC ha kaba ïadei bad ka jingpyn ïoh ïa ka kali kit nongpang ka ban long ka jingkyrkhu ïa ki paidbah bad ka Synjuk lyngba kiwei kiwei ki lad ki lynti kan dang ïakhun ban dang pynïoh shuh shuh ïa ki Ambulance ban ïoh buh ha man ki dong haka them Ri-Bhoi ban ai ka jingshakri sha ki paidbah kiba pang ba shitom lyngba ka Ambulance.
