Khlem kreh eiei halor ka Petrol Pump ha 6 mer shiteng, shen lah ban Ïeng ka Police Station ha Upper Shillong

SHILLONG, Jymmang 22: U Symbud Myntri Rangbah ka jylla u Bah Prestone Tynsong u la pyntip sha ka Synjuk Nong Synshar Shnong Upper Shillong ba la shem taiew un sa leit ban jngoh ïa ka thain Upper Shillong ha kaba ïadei bad ki kam pynroi ha kaneka dong ka thain.
Kane ka jingpynsngew ka long hadien ba ka kynhun Synjuk Nong Synshar Shnong Upper Shillong kala leit ban ïa kynduh ïa u hapoh ka ophis trei kam jong u ha Secretariat.
Haba kren bad ki lad pathai khubor hadien ba la dep ban kynduh ïa u Bah Prestone u Executive Member jong ka Synjuk u Bah Arju Dkhar u la ïathuh ba un sa wan jurip bad jngoh ïa ki jaka ha kane ka dong ka thain namar ba kila ïa kren halor ki mat kiba bun na ka bynta ka roi ka par na ka bynta ki nong shong shnong ka thain Upper Shillong baroh kawei.
“Da lada de hi u la ong ba un sa wan jurip ha kaba ïadei bad ka Police Station namar ba ïa kane ka mat ngi la ju pynsngew naduh ki por ba kham mynshwa kaba don hajan ka jingkieng Umshyrphi bad ka jingiakren ka long kaba sngewtynnad bha” ong u Bah Arju.
Lada don lah don ka Police Station kan sa lah ban teh lakam ïa ki kam sniew ba ha rukom hapoh jong ka dong ka thain, la ong u Bah Arju.
Halor ka jingthmu ban shna ïa ka petrol pump ha 6 mer shiteng, u Bah Arju u la ong, Ngi la shu ioh ban ïa kren hangto namar ba kane ka mat mynta ka dang don hapoh ka ïing kashari namar ba ngim kwah ban pynkhein ïa ka rai jong ka ïing bishar bad ngi hap ban iaid bin pa bin bad ngam pat lah rai haduh mynta.
Ha kane ka sngi ki la don haduh 14 tylli ki dorbar shnong kiba la wan ban kynduh lang ïa u Bah Prestone Tynsong.