Shongshit ka jingïakop mareh ha Nongstoiñ bad Mairang, tuid da ki spah ngut ki samla

Nongstoiñ, Risaw 31: Ha ryngkat bad ka Ri baroh kawei, ïa ka Fit India Swacchta (Freedom Unity) ba la rakhe da ki bor pynïaid District ha ryngkat ka jingtrei lang jong ka District Sport Officer West Khasi Hills, ki la pynlong mynta ka step jong ka 31 tarik u Naiwieng 2024 ïa ka jingpynïakop mareh lane ka Freedom Unity Run 5.0 2024 10 Km, ha kaba da ki spah ngut ki nongshong shnong ka thaiñ ki la wan ban ïashim bynta ha kane ka jingïakop, kynthup ïa ki shynrang bad kynthei bad ïa ki nongjop la ïoh ban sam da ki khusnam pisa ha ryngkat bad ki syrnod
Ïa kane ka jingpyn mareh la kaweh lama da u Additional Superintendent of Police ka West Khasi Hills District bah H.Kharkongngor MPS, kaba la sdang na ka phyllaw jong ka DC ophis ha ryngkat ka jingdon lang jong ki officer ka District.
La pynkut da ka jing pule ïa ka pledge jong ka Fit India bad Rashtriya Ekta Diwas (National Unity Day) ba la ïalam da u ASP bad baroh ki ophis Sorkar ruh ki la ïa pule ïa kane ka pledge ha la ki jong ki ophis.
Ïa ka buskit ba nyngkong napdeng ki shynrang la ïoh ban rah da u Banjoplang Wanniang, ba ar Shankupar Puweiñ bad ba lai Phailang Rngaid. Na ka liang ki kynthei ïa ka buskit ba nyngkong la ïoh ban rah da ka Abbagraceful Nongkseh, ba ar Phibapyntngen Nongphud bad ba lai Iutiful Tympuiñ.
Mairang: Ka Ophis treikam jong ka District Sports Officer West Hhasi Hills District Nongstoiñ, ha ryngkat ka jingïatreilang bad ka Ophis ka Deputy Commissioner Eastern West Khasi Hills District, mynta ka step 31 tarik Risaw 2024 ka la pynlong ïa ka ‘Fit India Swachatta Freedom Unity Run 5.0 2024’ ha ka jingjngai kaba 10 km.
Ha kane ka sngi la wan ban kaweh lama ïa kane ka jingïakob da u ADC ka EWKHD u bah A.Nongbri kum u kongsan ha ka jingïadonlang ka DSO WKH ka kong Balarina Syiem ki nongkitkam ka tnad Sports kumjuh na ka tnad pulit Mairang bad kiwei de.
La sdang ïa kane ka jingïakob mareh naduh ka Ophis treikam jong ka DC bad la pynkut ruh ha kane ka juh ka jaka, ïa kaba la sakhi ba da ki spah ngut ki samla kynthei bad shynrang ki la wan ban ïashimbynta ha kane ka jingïakop.
Ha shwa ban sdang la ïoh ruh ban pule ïa ka pledge ‘Rashtriya Ekta Divas’, kum ka dak ka jingrakhe ïa ka sngi kha u Sardar Vallabhbhai Patel u riew pyrkhat bad u nongsaiñdur jong ka ri India.
U Bah A.Nongbri haba kren kum u kongsan, u la pynpaw ba ka jingpynlong ïa kane ka marathon ka long kum ka jingrakhe ïa ka jingïatylli ha kaba kat nang mih kin sngi ki nongmareh marathon na ka District ki la sdang ban bun. U la ong ba ka jingïakop mynta ka la nang jur bad ha ka jingïaleh ki don ki nongjop ki don ruh ki bym poi sha ka thong.
Hynrei, u la ai mynsiem ba kin practice kham bha bad minot ban leh bha, ha kiwei ki jingïakob ki ban sa long bad na kane ka jingsdang kaba rit, kin sa poi pat sha kiwei kum ha ki jingïakop ha ka state level bad ha ka National level ruh kumjuh.
Ha katei ka jingïakob mareh ïa ka kyrdan ba nyngkong ha ka liang ki shynrang la ïoh rah da u Mebansaiñborlang Pathaw, u Wanbok L.Mawphlang ha ka kyrdan ba ar bad u Wankyrmen L.Mawphlang ha ka kyrdan ba lai.
Ha ka liang ki kynthei ïa ka nam ba nyngkong la ïoh rah da ka Bandasharai Marweiñ, ka Ramafully Thabah ïa ka kyrdan ba ar bad ïa ka kyrdan ba lai la ïoh rah da ka Nerisha Nongrum. La ïoh ruh ban sam ïa ki khusnam sha ki nongjop da ki Syrnod ha ryngkat ka song pisa.