Nongstoiñ, Naitung 14: Ki nongïalam ka Hynñiewtrep Youths Council Rambrai Circle hadien ka jingujor na ki paidbah halor ka jingbym don kali kit nongpang, ka jingbym don nongai dawai ha pharmacy bad ka jingduna nongtrei ha Rambrai PHC la lai snem, ki la leit ban ujor sha ka District Medical and Health Officer bad buh jingkylli ruh kaei kaba jia ïa ka Rambrai PHC haduh katne.
U samla Drowell Lyngdoh President, samla Kobinkupar Syiemlieh bad u samla Lumlang Kharsyiemlieh President HYC West Khasi Hills District, mynta ka sngi 14 tarik Naitung 2026, ha ka jingleit ïakynduh bad ka DMHO ha kamra treikam, ki la pynpaw ba kane ka jingbym don kali kit nongpang, ka la wanrah jingeh ïa ki paidbah ka thaiñ kaba la heh la ïar.
Ha ka jingshisha wat ka C&RD Block ruh la ïoh, hynrei haduh mynta pat tang ka kali kit nongpang ruh la lai snem ym don satia. Nangta lada ym don nongai dawai ha ka Pharmacy ha katei PHC, ka la buh jingeh ïa ka thaiñ bad jingduna.
Na ka liang ka DMHO ha ka jingïakren bad ki dkhot nongïalam jong ka seng, ka la ong ka la dep pan ne thoh bunsien, hynrei kam pat urlong haduh mynta ruh bad na ka liang jong i, in nang buddien.
Ka HYC Rambrai Circle ha kajuh ka por ka la buh jingkyrpad ruh sha Bah RG Momin MLA Rambrai ban shimkhia lem ïa kine kiba la duna, haduh ba ka la long ka jinglehrañ ïa ka thaiñ haduh katne la shah iehnoh beiñ. Kum u MLA la kumno kumno un sngewbha ban ïarap lem.
