Shillong, Naitung 14: Ka Khasi Student Union seng kmie kala kren da kaba shai kdar ïa ka sorkar jylla ba kam dei ban dang pynshad shrieh ïa ka seng, hynrei kala dei ban pyntrei kam mardor ïa ka MRSSA 2016.
Haba kren bad ki lad pathai khubor u samla Rueben A Najiar u la ong,”Ka MRSSA kan ym lah ban bujli ïa ka Inner Line Permit (ILP) namar ba ka jingdawa ILP ka dang ïai neh hapoh ka jylla Meghalaya, hynrei na ka liang ka seng ba kat bym pat ioh ïa ka ILP pyntrei kam noh mardor ïa ka MRSSA”.
Kumba phi tip naduh u snem 2013 na ka liang ka seng ngi la ïakhih bad kiwei de ki seng bhalang halor jingdawa ILP bad ha kito kip or hadien ka jingïakhih lah bun ki jingïa kren ban ong ba ka ILP kadei ka subjek jong ka sorkar India bad kam dei ka bor jong ka jylla bad la wanrah noh ïa ka MRSSA ha u snem 2026 u la ong.
Na ka liang jong ka seng ngi sngewthuh ba katba ngim pat ioh ïa la ILP ban shu ieh khongreng ruh ym long namar ka jingwan tuid ki mynder ngi donkam ïa ka aiñ ban teh lakam khyndiat bad ha ka por ba wanrah ïa ka MRSSA ngi pdiang, ong u samla Rueben.
“Lyngba kane ka aiñ, ngi tp pat mano ba rung mano ba mih bad mano ba don hapoh shnong ki shnong ki thaw bad ha kaba iadei bad kane ka bynta ha u 2016 ngi la pdiang ïa ka MRSSA ba kan long ka aiñ ba pura bad hadien ka jingtrei kam ka MRSSA lah dei ban shna ïa ki district task force bad kiwei kiwei” ong u samla Rueben.
Shuh shuh u la ong, Naduh 2016 ka mih kane ka Act lah dei ban thaw ïa ki District Task Force hynrei haduh mynta kawei ka District Task Force ha ki district bapher bapher ym pat trei kam haduh mynta, lait noh ha East Khasi Hills District kiba dang pyntrei kam tang kum ki Pilot Project haba lah don ka aiñ.
“Kaei kaba eh ïa ka sorkar ba kan pyntrei kam ïa kane, hooid ngi sngewthuh ba ki don ïa ki briew te lah dei ban leh kumba la leh lang ïa kiwei kiwei ki kam pynroi hynrei kana pat ba dei na ka bynta ka jingshngain balei phim lah ban pynmih” u la ong.
U la ong, “Mynta katba dang mih ki sngi ka influx ka dang kiew bad kam shym la don kano kano ka aiñ kaba ïada ïa ngi, Ngi iohi ha West Bengal bad ha Assam u Myntri Rangbah u dang kyndang ïa ki ba suba nong Bangladesh…..kine phi mut kinleit phai sha Bangladesh em kin rung kin mih beit hi namar kam don kano kano ka aiñ ban teh lakam”.
Shuh shuh u la ong, Lyngba kane ka kyrwoh nga kwah ban pynrem ïa ka jingkren u Myntri Rangbah bad u Tourism Minister ba ki ïalam bakla ïa ki paidbah ha kaba iadei bad ka MRSSA namar ba ka jubab RTI bad ka jingkren u CM ka pher bak ly bak bad kam don jingeh ban pyntrei kam ïa ka MRSSA bad ngi donkam ban peit ïa ka influx.
