Nongpoh, Nailar 17 : Wat la haduh mynta ym pat don ka jingpynthikna ba u Samla Sunshine Makri na Umsning Constituency un ioh ïa ka Ticket UDP ban aireng ha ka election 2023 na Umsning Constituency, hynrei kum u samla uba la thmu ban mih madan ha kane ka kynti mynta ka sngi u la shimti noh ban long kum u President ba rangbah ka Umsning Constituency People’s Forum (UCPC) ban ïalam ïa kane ka kynhun kaba u la pynkhreh ban aireng ha kane ka election 2023 na Umsning Constituency.
U Samla Sunshine Makri kum u kyrtong uba la mih shakhmat ban pan ticket na ka UDP Party, u la shimti noh ïa kane ka kam President jong ka Umsning Constituency People’s Forum ka dei ha ka jingïalang kaba la long hynin ka sngi ha Nongthymmai, Umsning ha kaba u Bah R.B Shadap, uba bat shipor kum u President ka Umsning Constituency People’s Forum u la aiti da ka mon sngewbha ïa kane ka lyngkor President sha u Bah Sunshine Makri ban ïalam ïa kane ka kynhun kaba u la mih pyrthei ban aireng na Umsning Constituency.
Ha kane ka sngi ba la shimti u Samla Sunshine Makri ïa ka lyngkor kum u President ka UCPC la don ryngkat naduh u Bah R.B Shadap,uba dei u President barim bad kynthup kiwei ki nongïalam katei ka kynhun, ba kane ka kynhun ka la ïaid shakhmat ban dang pynkhlaiñ na ka bynta ka election ban sa wan jong u snem 2023 hapoh ka jylla bad ha kajuh ka por ruh kumba la sawa ka sur na kiba bun balang u Samla Sunshine Marki u la pan ticket ruh na ka UDP party ban ïa khun na Umsning, ba haduh mynta ym pat shym la pynbna la un ioh ïa ka ticket UDP ne un ïa khun na katei ka kynhun Umsning Constituency People’s Forum(UCPC).
