Nongpoh, Nailar 17: Ka long shisha ka jingkyrkhu ka ba khraw naka bynta ki nongrep jong ka thaiñ Bhoirymbong ha kaba hynin ka sngi la ioh ban plie ïaka karkhana rit ban pynmih bad pynïaid iew ïaki mar rep jong ki nongrep lyngba ka Eastern Ri-Bhoi Organic Farmer Producer Company LTD, bala tip kum ka Integrated Processing Unit and Organic Outlet ha Khapmara Bhoirymbong.
Ïa katei ka karkhana rit la tei haka jinglut ka ba 35 lakh lyngba ka scheme Mission Value Chain Development Phase-1 jong ka sorkar pdeng bad haka juh ka sngi la ioh ruh ban ot ribon ïa 4 tylli ki pick-up truck ka ban sa ioh ban pyntrei kam na ka bynta ban kit iaki mar-rep ba pynmih na katei ka kharkhana bad kumjuh ruh kawei ka kor lur.
Ha kane ka sngi la wan ban plie paidbah ïa katei ka kharkhana rit da u bah George B Lyngdoh, MLA ka Umroi Constituency u ba la shim ruh ïaka bynta kum u Kongsan, ha ka jingdon lang u bah Rangkynsai kharbuki, MDC Umroi Constituency kum u symbud kongsan, u S.C Sadhu IAS, Secretary jong ka tnad Agriculture & Farmer Welfare ka sorkar jylla, u Arpit Upadhyaya DC ka Ri-Bhoi District, Dr. CJK Warjri, BDO ka Bhoirymbong bad kiwei kiwei ki ophisar na ka tnad jong ka Horticulture bad Agriculture.
Haba kren ha katei ka sngi naka liang u Bah George B Lyngdoh u la pynpaw ka jingsngewkmen kaba khraw bala ioh ban plie paidbah ïa katei ka karkhana rit kaba lah ban pynmih ïaki mar rep na katei ka thaiñ naka bynta ka jingbit jingbiang bad ka jingmyntoi jong ki nongrep khamtam ban pynmih ïa shibun jait ki mar bam lyngba ki mar rep mar riang kiba khlem da pyndonkam dawai.
U la ong ruh baka lyngba katei ka karkhana rit kan long ka thong ba kongsan naka bynta ban kyntiew ïaki nongrep ha katei ka thaiñ khamtam ban pynmih ïaki mar rep bad kiwei kiwei ki mar bam ban sa pynpoi pat sha kiwei kiwei ki jaka haka jylla bad wat shabr ka jylla.
