Nongpoh, Naitung 09: Ban shimti kum u khlieh nongsynshar na ka bynta ka bha ka miat bad ka roi ka par ki paidbah hapoh ka shnong Borbhuiñ ba hap ha ka Raid Marwet jongka Hima Mylliem Syiemship, u Bah Dwijen Ronghang u la shah jied kum u rangbah shnong ba pura ka shnong Borbhuiñ, kaba dei hadien katto katne por u la bat kum u Acting rangbah Shnong bad hynnin ka sngi pat ki paidbah ki la pynskhem kum u rangbah shnong ba pura da kaba ïa jied paidbah ba u la jop kum u rangbah shnong ka Shnong Borbhuiñ.
Kane ka jingshah jied u Bah Dwijen Ronghang kum u Rangbah Shnong ka Shnong Borbhuiñ ka dei ha ka jingïajied paidbah hynnin ka sngi Saitjaiñ ha ïing Dorbar Hall ka Shnong Borbhuiñ ba la pynïaid da ki nongmihkhmat na ka Hima Mylliem ha ka jingdon u Basan Nongkseh, u Myntri K. Langstieh bad kynthup ruh u Syiem ka Raid Marwet, u Paiem Ken Syiem bad ki longsan ki mansan.
Haba ïa khun na ka bynta ka kam rangbah shnong ki don haduh 4 ngut ki rangbah kiba la tyrwa sha u paidbah bad napdeng kitei ki saw ngut, u Bah Dwijen Ronghang u la ioh ïa ka jingmynjur kaba bun na ki paidbah kiba la ai ka jingkyrshan haduh 88 ngut, bud sa u Bah Purma Lapang, u ba la ioh 78 vote, bud sa u Bah Lumlang Mawnai, 48 vote bad u Bah Dilip Khrakrang 21 vote.
Hadien ba la jied paidbah, bad u Bah Dwijen Ronghang u la shah jied kum u rangbah shnong ba thymmai, u Basan Nongkseh na ka Hima Mylliem bad ruh ryngkat ka jingdon lang u Paiem ka Raid Marwet, u Paiem Ken Syiem ki la ai ka jingpynskhem kum u rangbah shnong ba pura ïa u Bah Dwijen Ronghang ba un shimti ïa ka kam synshar shnong kiba dei katkum ka riti ka dustur.
