Nongpoh, Naitung 09: Kumba ju long man la u snem ha ka por lyiur ki paidbah nongshong shnong ki ju mad ïa ki jingeh ha ka leit ka wan bad khamtam ki nongshong dukan bad ka daw hi ka long na ka jingbym biang ka Nala um ka surok 4-lane ha kaba tang shu ther u lapbah ki la hap ban mad ïa ka jingshlei um kaba wan rah ïa ka jingsyrtok ha ka leit ka wan khamta ki nongshong dukan kiba kham shah ktah ha die ka woh.
Kum ban pynkynmaw, kane ka jingshlei um ka ju jia ha bun ki bynta jong ka surok 4-lane ha Ri Bhoi bad kane ka jingshlei um ruh ka la jia naduh ba la pynheh ïa kane ka surok 4-lane kaba dei na ka jingbym biang jong ki nala um.
Kane ka jingïai mad ki paidbah ïa ka jingshlei um la sakhi ruh mynta ka sngi, kaba dei hadien ba ka jingther u lapbah ka la pynshlei um shaduh ka surokbah bad ka surokbah ka la tap da ka um na ka daw ka jingbym biang ki Nala Um.
Haba kren halor kane ka jingmad ki paidbah ïa ka jingshlei um ha ka por lyiur ne ka por slap, ka jingkynnoh kam dei ruh tang na ka daw ka jingpynheh ïa ka surok 4-lane, hynrei hap ruh ban kynnoh ïa ki paidbah ha kaba kum ki paidbah ruh kim don ka jingïakitkhlieh lang ha kaba ïa ki jaboh la bret sha ki nala um ha ka por ba tyrkhong bad tang shu slap pat ka um kam ioh ban tuid sha ki jak aba dei ban tuid bad dei na kane ka daw ka wan ka jingshlei um sha ka surokbah.
Haba kren ruh halor kane ka jingshlei um kaba la jia man la u snem, ïa kane ka jingeh la ju ïa kren sha ki bor ba dei peit ka NHAI ba ka dei ban pynheh noh ïa ka Nala um, hynrei kane ka jingïakren kam shym la poi shano shano bad la shu ïa kren tang ha ka por ba ki paidbah ki mad ïa kine ki jingshlei um katba ha ka por tyrkhong pat kam ju don kano kano ka jingshim khia ban ïa kren ne pynheh ïa ki Nala um.
Naduh ki nongmih khmat na Ri Bhoi, ka Nongpoh Town Committee, ki rangbah shnong bad ka bor synshar District ha ki snem ba la leit noh ki la dep ruh ban pynsngew sha ka NHAI ba ka dei ban shim khia halor kane ka jingeh ki paidbah, hynrei kaba sngewsih ka long haduh kine ki sngi ym shym la iohi sati aba ka NHAI kan shim khia bad tang shu poi ka por slap ki paidbah ki hap ban mad ia ka jingeh kaba dei na ka jingshlei um sha ka surokbah.
