Nongstoiñ, Naitung, 9: Na ka bynta ban ai ka jingshakri ba kham bha na ka bynta ka jingmyntoi jong ki paitbah bad ki samla, ki nongïalam jong ka Hynñiewtrep Youth Council West Khasi Hills District unit, ha ka sngi thohdieng jong ka taiew ba la dep ki la leit ban ïa don lang ha ka jingïalang jong ka Regional Committee on Border Dispute ha TRYSEM hall kaba la khot da u bah Paul Lyngdoh Myntri ka sorkar MDA uba dei ruh u chairman ka Regional Committte.
Ka seng ka la aiti ha utei u Myntri sorkar ka long halor ki saw tylli ki mat kiba ki nongshong shnong hapoh ka District ki donkam eh. Ka seng ka la pynpaw lyngba ka jingthoh ba la aiti ha u myntri, ba ka jingkhaïi drok ka la jur bha bad bun ki khynnah, bad ki samla kynthei shynrang ki la ngop ha utei u jait jingdih ba shyrkhei. Nalor nangta ym pat don kano kano ka jaka sumar ban ïarap ïa kiba la kyrni ha u drok ba kin iehnoh noh.
Na ka liang ka seng ka la pynpaw ruh lada ki kmie ki kpa jong ki khynnah ba la kyrni ha u drok ki dei kiba duk, ki shem shitom haduh katta katta ban paha sumar sha Shillong. Namar ka bai sumar ka long kaba rem bad ka la don kam ba ka sorkar kan buh noh kawei ka rehabilitation centre ha Nongstoiñ.
Ka mat kaba ar ba ka seng ka la pynpaw lyngba katei ka jingthoh, ka dei ka Chief Minister Disabilities Pension Scheme 2012 kaba la pyntrei kam da ka sorkar na ka bynta ban ai jingïarap sanspah tyngka sha kito kiba duna dkhot met,ha kaba ki la kdew ba kat kum ka jingïaid ka por ka sorkar ka la dei ban kyntiew noh sha ka shi hajar tyngka shi bnai.
Ka mat kaba lai kaba la kdew ha katei ka jingthoh ka long halor ka bhah thungkam ïa kiba duna dkhot met lyngba ka District Selection Committee ba ka sorkar ka la dei ban shimkhia halor katei ka mat.
Ka mat kaba saw ba ka seng ka la pynpaw lyngba katei ka jingthoh, ka long kumno ban kyntiew ïa ki kam jngohkai hapoh ka District, namar ka West Khasi Hills ka dei ka District kaba bun bha ki jaka jngohkai kiba itynnad. Kumta ka seng ka la kyntu ïa u kum u Myntri ba dei peit ïa katei ka tnad, ba un thaw lad ban kren sha ka sorkar ba kan pynïoh ïa ki jaka sah kiba biang na ka bynta ki nongwan shangkai suwari, khnang ba kan plie lad ïa ki samla ki bym don kam ba kin kyntiew ïa ka kamai kajih bad ka ïoh ka kot ka jong ki.
Ka mat kaba khatduh kaba ka seng ka la pynpaw ha u Myntri lyngba katei ka jingthoh ba ki la aiti ha u, ka long ba ka la kyrpad ïa u ba un pynsngew sha ka sorkar ba kan pynbha shuh shuh ïa ki lynti synkieng bad ki surok kali kiba leit sha Dewlynnong Nongkhnum, khnang ba kan khring shuh shuh ïa ki nongwan jngohkai bad ka jingmyntoi kan long ïa ka sorkar bad kumjuh ruh ïa ki paitbah nongshong shnong ka West Khasi Hills District.
