Nongpoh, Lber 24: Ban pynurlong ïa ka thong jong ka seng ban shakri na ka bynta ki paradoh ki para snam ha ka jylla, ka HANM sengkmie ha ka jingïalam u President ba Rangbah, u Bah Lamphrang Kharbani haka sngi Saitjaiñ ki la lah ban pynthymmai ïa ki nongïalam ba pura ka HANM ha Ri Bhoi District
Ki ar ngut ki samla na Ri Bhoi ba kynthup ïa u Samla Ajit Makri u la shah pynkhamti kum u President bad u Samla Donroy Kshiar kum u General Secretary ka HANM ha Ri Bhoi nalor kiwei kiwei ki nongïalam ba la pynthymmai hynnin ka sngi ha ka jingïalang kaba la long ha Dorbar Hall Pahamsyiem.
Ïa kitei ki nongïalam la pynskhem bad pynbam smai katkum ki kyndon treikam ka HANM da u President ba Rangbah, u Bah Lamphrang Kharbani ha ryngkat ki jingsneng jingkraw ba kin shimti hok ïa ka lyngkor ba la bynshet ïa ki kum kita ki nongïalam ka seng.
Haba ai jingkren ha kane ka sngi, u Bah Lamphrang Kharbani kum u nongïalam ba rangbah ka seng u la pynpaw ïa ka mynsiem jong ka jingkmen ba ki smala ka Ri Bhoi ki la wan ban pynïasoh sha ka seng namar ka thong jong ka seng ka long ban ai ka jingshakri na ka bynta ka eh ka shon jong ki paradoh ki para snam.
Ku u nongïalam u la kren ruh halor shibun ki mat ki jura jong ka jaid byrniew ba ka seng HANM ka la ïaid lynti ban ïada ïa la ka jaid bynriew bad kum ka seng ka dang donkam ruh shibun ki shipai jaid bynriew khnang ban lah ban ïada kyrpang ïa la ka jong ka jaid bynriew.
Shuh shuh, u la kyntu ruh ïa ki ba kum ki nongïalam ki dei ban don ka jingkitkhlieh ban ai ka jingshakri sha ki paidbah ka District bad ym ban wan ban pynïasoh sha ka seng tang ba ioh jingmyntoi shimet ba ka thong jong ka seng ka long ban peit kyrpang ïa ka eh ka shon ka jaid bynriew.
