Nongstoiñ, Lber, 24: Ka KSU West Khasi Hills District Unit ha ka jingïalam u samla Wanbhakupar L.Nonglait Organising Secretary KSU West Khasi Hills District, ha ka jingsynran lang u Samla Mixz Samakha u ba dei u Finance Secretary KSU West Khasi Hills District, ka la leit khynra Work Permit, Labour License ïa ki nongtrei bar jylla kiba trei ha ka Shnong Sohparu Nongstoiñ, kiba pyntrei ïa kawei ka skul ba la tip kum ka Residential School, ba la pyntrei da kawei ka Company ba la tip kum ka WAPCOS Limited ba dei na West Bengal.
Ha katei ka jingkhynra, ka seng ka la lap ba la jan kot shi spah ngut ki bar jylla kiba wan trei ha katei ka jaka. Napdeng kitei kiba bun kim don satia ki kot ki sla kiba biang katkum katei ba la kdew haneng, kumta na ka liang ka seng ka la phah leit phai noh sha ki jaka ba ki wan ryngkat ka jingmaham ïa katei ka Company, ba ym bit ban wanrah nongtrei bar jylla palat ïa ka NoC ba la buh da ka shnong hangtei.
Ka seng ka la dawa ruh ba dei ban thep kham bun da ki Khasi kiba la lah ban trei ha katei ka jaka ne ïa katei ka kam. Ka seng ka la ong ruh kan sa wan mih biang ha kiwei ki sngi bad lada lap ba ki pynkheiñ biang, ka seng kan shim da ka lynti kaba kham tyngeh la pynkut na ki nongïalam jong ka KSU West Khasi Hills District.
