Khliehriat, Lber, 24: Ka kynhun jong ki nongtrei kiba trei ïa ki kam electrical works ba iadei bad ki kam bor ding ka la mih pyrythei ha East Jaiñtia Hills District ba la tip kum ka East Jaiñtia Electrician Association, kane ka kynhun ka lum ka lang ïa baroh ki nongtrei kiba na ka thaiñ East Jaiñtia Hills District kiba ju im ja da kaba trei ïa ki kam bor ding lane ki electrical works.
Ha ka jingïalang kaba nyngkong eh kaba la pynlong myn ha ka sngi saitjaiñ ha ïing Community Hall ha Khliehriat West ka seng ka la pynbna ba kane ka seng ka don ka jingthmu ban kyntiew ïa ki briew jong ka thaiñ kiba ju trei ïa ki kam shna bor ding ha ka thaiñ.
Haba kren kum u kongsan ha ka jingïalang, u bah Deibormi Syad uba long u nonghikai skul bad ruh u nongtrei paitbah, u la ai mynsiem ïa ki nongialam bad ki dkhot jong ka East Jaiñtia Electrical Association ba kin nang kiew shaphrang ban kyntiew ïa ki khun samla jong ka thaiñ kiba don ka sap ban trei ha ki kam bor ding bad kyntu ruh ba ki dei ban don ka jingiasngewthuh jingmut, ka jingiaburom kylliang bad ban ïatreilang khang ba kin lah ban pyndep ïa ka kam ka jam kumba ki thmu ban kyntiew ruh ïa ka ïoh ka kot.
Kumjuh ruh u bah Streamly N Suchen, uba dei u President jong ka KSU na East Jaiñtia Hills District kum u symbud kongsan u la ai ki kyntien jingsneng jingkhraw ïa ki dkhot ka EJEA bad u la pynpaw ruh ka jingsngewkmen ba ki la don ki samla kiba la shimti ïa kane ka kam shna bor ding lane electrical works khamtam ha kum kane ka juk kyrduh kam u la ong ruh ba na ka liang ka seng KSU ruh ka long la kloi ban iarap ha kano kano ka por ne ha kano kano ka bynta ba donkam ban kyntiew ïa ki, u la ai ka jingkitbok kitrwiang ïa kane ka seng jong ki nong shna bor ding ba kin lah ban kiew shakhmat ha ka ban shakri ïa u paidbah jong ka district.
U MLA ba rim jong ka Khliehriat, u bah Justine Dkhar, kum u Advisor u la pynkynmaw ba ha ki por barim ki bun tang ki briew ba nabar khamtam kiba wan na bar jylla ban trei ïa kane ka kam shna bor ding ha ka thaiñ East Jaiñtia Hills hynrei sngewtynnad ban tip bad ban iohi ba kane ka kynhun East Jaiñtia Elactrical Association mynta ka la mih shakmat ban shim ïa kane ka bynta ban shakri ïa ka thaiñ da kaba shna bor ding ban long kum ka lad kamai “Kano Kano ka Seng ne ka kynhun kan iakynduh shibun ki jingeh jingwit ha ka jingiaid lynti hynrei ym dei ban duh mynsiem, dei ruh ban ïa trei da ka mynsiem jingiatylli bad burom iwei ia iwei, kum ka seng ka dei ruh ban don bun ki jingshah hikai ban tip bha ïa ka kam kum ki training bapher bapher bad ruh ban ai ki jingpyntip sha ki bor ba dei peit khang ba kin lah ban shakri bha ïa ki paitbah’ ong u bah Justine Dkhar.
U la ai mynsiem ruh ba kim dei ban sngew lehraiñ haba trei ïa kano kano ka kam.
Ha kane ka program la ïa don lang ruh ki katto katne ki riewpaw khmat ka thaiñ, ki rangbah shnong ba kynthup ruh u rangbah shnong ka Kairang, u bah Riki Nongtdu, u bah Shanki Syih, u ba dei u wei na ki samla rangbha ka thaiñ bad kiwei kiwei ba kynthup ki trai dukan ba die ïa ki tiar electrict ba don hapoh ka district kum ka Dasy Electrical, Joy Electrical, Sympli Electrical, E. D. Enterprises bad ka Joyti Electrical kiba don hapoh ka district headquarter ha khliehriat kiba la wan iasnohkti lang ha katei ka sngi.
Ïa ka ka program la pyniaid da u Secretary ka seng, u bah Jantis Dkhar, la ioh ïa ki kyntien pdiang burom bad jingpynshai halor ka nongrim jong ka seng na u President jong ka EJEA u bah Arki Juh Dkhar bad ki kyntien ai khublei na u Vice President ka seng, u bah Indro Syrti.
