Ngin ïai long ki dieng pynkiang ïa ka Sorkar lada wanrah ki aiñ ïakjakor: Forward Nongrem

Mawkyrwat, Lber 24: Ka Khasi Student’s Union (KSU) jong ka South West Khasi Hills District ryngkat ka Synjuk ki Seng Samla Shnong (SSSS), South West Khasi Hills District bad Federation of Khasi Jaiñtia & Garo People’s (FKGJP) kiba hapoh jong ka South West Khasi Hills District bad Mawsynram Block ki la pynlong ka jingïalang ban pyrshah bad thang ïa ki kyndon aiñ jong ka Citizenship Amendment Act ne CAA hapoh ïew Mawkyrwat, South West Khasi Hills District.
Lah ban kdew ba da ka jingïasnohkti lang jong baroh ki sengbhalang lem ruh bad ki paidbah kan pyni shai ïa ka jingïatylli jong ka Jaitbynriew ha ka ban ïakhun pyrshah ïa kino kino ki bor bad ki aiñ kiba ktah ïa ka ïap ka im jong ka Ri bad ka Jaitbynriew khamtam mynta ban ïeng pyrshah ïa ka Citizenship Amendment Act ne CAA.
U bah Forwardman Nongrem, President ka KSU, South West Khasi Hills District haba kren ha ka jingïalang u la ong ba, “horkit hordang da lei lei ngin nym shah ba ka sorkar India lyngba ka Sorkar kaba la lamkhmat da ka BJP kan pyntreikam ïa kino kino ki aiñ kiba ktah ïa ka jaidbynriew rit paidbah kum ka Jylla Meghalaya bad kumjuh ruh kiba ktah ruh ïa u paidbah, bad ym tang kata ngin ïai long ruh ki dieng pynkiang ïa ka sorkar lada wanrah ki aiñ ïah jakor”.
U la pynkynmaw ruh ba kum ki sengbhalang hapoh jong ka North East hi baroh kawei, ymdei tang mynta ka sien ba ki pyrshah ïa kane ka aiñ, hynrei naduh ba kane ka aiñ ka dang long tang ka Citizenship Amendment Bill (CAB), hynrei la ïohi pat ba ka sorkar NDA hapoh ka jingïalam jong ka BJP lyngba u Narendra Modi ha kaba um shym la sngap ïa kita ki jingpynsngew bad ïa ka sur jong ki paidbah kiba pyrshah. U la ïathuh ruh ba hadien ka Act, don sa ki kyndon ne ki rules ban batai ba kumno kita ki briew kiba dei na Pakistan, Afghanistan bad Bangladesh kin ïoh ban rung sha kane ka Ri India ne ha kine ki jaka jong ngi bad ynda ki la ïoh ka kabu ba biang kin sa leit da ka online lyngba ki sait ba la buh bad rung sha ki District Level Committee.
“Ki District Level Committee kin sa don”, ai jingmaham lypa ka KSU ba lada kine ki committee ki nud ban pynrung ïa ki nongwei shi sngi ban long ki dkhot ne ki nongshong shnong ha kine ki jaka jong ngi bad lada jia ei ei ne mih kino kino ki jingeh/jingkulmar bad jingthut ïa ka shongsuk ka shongshngaiñ, ma ki kin hap shim ïa kata ka jingkitkhlieh.
U la kyntu ïa ki paidbah ba ynnai khmih lynti than eh ïa kata ka myntoi shimet, keiñ noh ka jingsngew party ba tang kata ka party ba ki ki kyrshan ka leh kata ka kam ban pyrshah hynrei ban myntoi lang baroh u paidbah to kin bret noh ïa kaba kum kata ka jingsngew bad shim ba ki mat jong ka jaidbynriew ki dei ki mat ba hakhmat eh bad ymdei ban ïa peiñ badno badno ruh. “Ka jingong ba ym lah ban pyntreikam ïa ka CAA ha kita ki schedule area, kane ïoh dei tang ka jingong ne pynsngew ba mynta ka dang don ka ilekshon hynrei ynda la kut ki kylla ka jingkren”, ong u bah Nongrem.
U la ong ruh ba ha kum kane ka por ki paidbah nongshong shnong ki dei ban bret noh ïa ki jingïapher shnong, pher jaidbynriew, pher niam, pher jait ne kynja hynrei ki dei ban long kawei ban ïeng tylli ban pyrshah ïa kane ka CAA, bad la ïohi ruh ba ka Sorkar India haba ngi pan da ka dohkha ki ai pynban da u bseiñ (ngi pan ïa ka ILP ki ai pynban da ka CAA). “Kan kham bha ïa ngi ba ngin pynkheiñ ïa kata ka aiñ ba la thaw da u briew ban ïa kaba pynkheiñ ïa ki aiñ kiba U Blei U la ai ha ngi ba ngin long ki trai shnong, ngin long ki nongshynshar, ban long ki trai jaka, trai muluk kiba shongsuk shongshngaiñ ha la ka jong ka ri”, la pynsngew u bah Nongrem.
U la bynrap ruh ba lada kane ka aiñ kan ïaid shakhmat ha ka ban pyntreikam, ma ngi pat ki shnong ki thaw, ki Seng Samla Shnong, ki Seng Longkmie, bad ki Sengbhalang bapher bapher kin sa thaw hi ïa ki ILP/ki work permit hapoh la ki jong ki shnong ban long ka jingïada namar ki aiñ shnong ki long kiba khlaiñ.
Kiwei kiba la ai jingkren ki long u bah Zandy Sohtun, General Secretary ka KSU HEHU Unit, u bah D.K. Lyngdoh Nonglait, President ka FKJGP South West Khasi Hills District, u bah Raymond Kharjana, Organising Secretary ka KSU Central body bad u bah Wallambok Syiemiong, Chairman jong ka Synjuk ki Seng Samla Shnong, South West Khasi Hills District.
Shwa ka jingïalang, la ïoh ïa ka jingrwai Ri Khasi Ri Khasi hapoh ka jingïalam jong u bah Jiedskhem, General Secretary jong ka KSU, South West Khasi Hills District. Hadien kata ki la thang ïa ki kyndon aiñ jong ka Citizenship Amendment Act ne CAA.