Nongstoiñ, Lber 24: Ha ka sngi thohdieng ba la dep ki nongïalam jong ki ar tylli ki seng saiñ pyrthei, kata ka Voice of the People Party kaba la ïalam da u bah Ardent Miller Basaïawmoit u ba dei ruh u president rangbah bad ka Regional Democratic Alliance kaba la ïalam da u bah K.P.Pang-ñiang kum u president ka party HSPDP bad u secretary ka RDA bad ka United Democratic Party ba la ïalam da u bah Metbah Lyngdoh MLA, lem bad u bah Robertjune Kharjahrin kyrtong kyrtong MP, ki la hiar sha ka shnong New Mawlangsu ban pynlong ïa ka jingïalang paitbah na ka bynta ban pynshai ïa ki mat treikam jong ki na ka bynta ka elekshon MP ka ban sa long ha ka 19 tarik u bnai ban wan.
Ha katei ka sngi la pynlong ïa ka jingïalap elkshon ha kajuh ka rynsan ha kaba la pynïaid da u bah Phalastar Mawtyllup sordar jong ka shnong New Mawlangsu. Ha ka jingïalang pynshai paitbah kaba la sdang da ka Voice of the Peolple Party ha ka por shibaje shiteng noh phai sngi, ki rangbah kiba la ai jingkren kata u bah Marbud Dkhar, Powel Sohkhlet bad u Bah Ardent M Basaïawmoit ki la ban jur halor ka synshar khaddar kaba khuid bad ki jingkylla.
U bah Powel haba pynshai ha katei ka sngi u la ong ba u kyrtong jong ka VPP u Dr Ricky A.J Syngkon kum u nonghikai ha ka skul bah Nehu, haba u ïohi ïa ka jingeh ki paitbah khamtam eh ha ki nongkyndong u la mih shakhmat ban ïatreilang bad u bah Ardent Basaïawmoiot bad ban ïakhun ha kane ka MP Elekshon. Lada u jop un leit sha Parliament ban ïaid na ka bynta ki jingeh ba ki paitbah ki ïakynduh, la ka long ha ka pule puthi, ka rep ka riang bad ka roi ka par ha ki nongkyndong.
U bah Ardent M Basaïawmoit haba pynshai ha katei ka sngi u la ban jur halor ka synshshar khaddar kaba khuid. U la ong ruh ba ka VPP ka kwah ruh ban wanrah ïa ka jingsynshar kaba kynja Blei bad ka synshar tynrai kaba la buh naduh ki longshuwa.
U la kynthoh ruh ba baroh shikatta ki jingïalam bakla da kaba ong ba ka politic ka dei kaba jakhlia, hynrei ka VPP ka ieng halor ka synshsr khaddar kaba khuid bad ka kwah eh ban pynkhuid ïa ka bamsap na ka jylla bad ban pynskhem ïa ka jinglongtrai ha ka khyndew ka shyiap bad ban pynkut noh ïa ki jingeh ha ki shnong khppud.
Ha kajuh ka por u la ong ba ka sorkar kam ju kheiñ kor ïa ki nongrep hynrei ynda la jan ka elekshon, wat ki nongsor ki bym don kper ruh ki ïoh jingïarap skhim nongrep, ki bym ju ri sniang ki ïa ka jingïarap ri sniang, hynrei ynda ki wan rah sha ïing ïap lut sa ki sniang kiba la don lypa.
Hadien ba ka VPP ka la pynwai ki nongïalam ka RDA ki la sdang ban ai jingkren ha kaba nyngkong eh la ïoh ïa ka jingpynshai na u bah K.P.Pangñiang president ka HSPDP, u la kyntu ïa baroh ki nongkyrshan jong ka HSPDP ba ha kane ka kynti kim dei ban sngewthuh bakla, namar ba ka shap jong u sing kan ym don hynrei kin thep beit ha ka shap jong ka UDP kaba dei ka Bom.
U bah Metbah Lyndoh MLA ka Mairang Chairman ka RDA, haba pynshai ha katei ka sngi u la ong ba na ka por sha ka por ki paitbah ki thnum bad ki ud ba balei ki party riew lum kim ïatylli lang kawei. Dei halor katei ka nongrim ba na ka liang ki nongïalam ka UDP bad HSPDP ki la sngap ïa ka jingai jingmut jong ki paitbah bad ki la pynlong ïa ki jingïakynduh lang para nongïalam da ki phew sien, ban ïaphylliew jingmut na ka bynta ban wanrah ïa ka jingïatylli hapdeng jong ki.
Nalor kata u la ong kane ka election MP kaba mymta kan dei ruh ka sien kaba nynkong ba baroh artylli ki party ki la hap ban ïaleit lang ryngkat ryngkat haman la ki jaka ban pynshai sha ki paitbah ba dei tang da ka yn lah ban ïalehpyrshah ïa ki jingeh.
U la ong ba ki paitbah kim dei ban sngew phylla ïa ka jingïatreilang jong ka HSPDP bad ka UDP, namar baroh ar tylli ki party ki la dep ïamynjur lang ba ka jingïatreilang kan long ha baroh ki elekshon la ka dei ha ka MP, MLA bad MDC ruh, khnang ba ki paitbah kin sngewthuh ba ka jingïatylli ka long ka bor.
U bah Robertjune Kharjahrin haba pynshai sha ki paitbah ha katei ka sngi, u la ong ba kum u nongsaid aiñ u ba la long ruh u nongai buit jong ka KHADC, u la ong ba kum u samla rangbah u la mih sha khmat ban ïakhun ha kane ka elekshon na ka bynta ban ïasaid ha ka dorbar Parliament ïa ki mat ki jura ba ki paitbah ka jylla ki angnud ban pynneh pynsah.
U la ong ruh ba ha kine ki sngi ki don shibun kiba ong ba ïa ki nongmihkhmat na ki party riewlum yn ym don ba sngap lada ki kren ha Parliament hynrei kitei ki jingkren ki dei tang ki jingpynthame.
U la ong ba ki don haduh sawphew hynñiew ngut ki MP kiba dei na ki jaitbynriew riewlum. Lada kitei ki sawphew hynñiew ngut kin ïatreilang kawei ban dawa na ka sorkar pdeng ba ka dei ban phaikhmat lem sha ki jingeh ba ki jaitbynriew riewlum ki ïakynduh ym don jingartatien ba ka sorkar pdeng ka hap ban kohnguh.
Khatduh eh u la kyntu ïa ki paitbah ba haba ki nongïalam ki la pyni ïa ka jingïatylli, ki dei ban bud nuksa namar lada ka jingïatylli kam don, ka jingma kaba khraw ka ap ïa ka jaitbynriew khamtam eh ïa ka pateng ban sa wan.
