Ki jingïashrut hapoh ki paralok ba ïatreilang dei ban pynbeit kloi, ong u MLA ka BJP

Shillong, Lber 24: U MLA ka BJP napoh 19 South Shillong Konstituensi u Bah Sanbor Shullai uba la long teng u kyrtong ka BJP ha la ilekshon Lok Sabha ha ki snem ba la leit noh u la pdiang sngewbha ïa ka rai jong ki nongïalam ka BJP Sengkmie ban kyrshan lang ïa ki kyrtong monlang kiba ïatreilang hapoh ka sorkar NDA.
Ha ka kyrwoh khubor ha ka sngi Saitjaiñ u Bah Shullai u la ong ba na ka daw ba ka NPP ka dei ka seng kaba bun paid bad kiba la ïadonlang hapoh ka sorkar NDA, kam shym la don ka jingbakla na ka liang ki nongïalam ka BJP sengkmie da kaba ai ka jingkyrshan ïa ki kyrtong ka NPP na Shillong bad Tura seat.
U la ïathuh ba ha u snem ba la leit jong ka ilekshon MP na ka liang ka BJP ka la don ka vote bank kaba la shu kheiñ antad kumba 70 hajar ngut da kaba thmu ruh ba kan sa kiew sha ka lak ngut na ka bynta ka Shillong parliamentary seat.
“Lada ïa kane ka jingïoh vote la ïoh ban ïabynta lang ka jingïatreilang jong ka NDA, kumta kan khambha ïa ka jinglah ban don ka lad ban jop da ka jingïaphiah ki vote. Kumta nga kyrpad ïa baroh ki nongïalam ka parti ba kim dei ban don ka jingïaphiah ha ki kam kiba hapoh ka parti bad ban ïalong kawei ba kan long kaba ïarap ïa ka sorkar NDA. Lada ka NPP ka jop, bad ki MP na ka jylla jong ngi kin ïoh ka lad ban pynpaw ïa ka sur kaba bha ban ïa u kyrtong ka Congress uba mynta uba don ha ka liang pyrshah,” ong u Bah Shullai.
U la ong ba kin don ki por ba ïaid shalyndet ka jingsngew parti bad ban buh hakhmat nyngkong eh ïa ka jylla na ka bynta ban ïoh ki lad pynroi.
“Kam don ka jingartatien ba ka BJP hapoh hapoh ka jingïalam jong u PM Modi kan ïoh kumba 400 tam tylli ki seat ha kane ka por, kumta lada ngi lah ban ai ar seat na ka Meghalaya kan sa ïarap ïa ka jylla ban ïoh khambun ki pisa bad ki skhim ka sorkar pdeng. Lada ngi jop baroh 2 seat, ngi la thikna ba kin ïoh ïa ki shuki myntri hapoh ka sorkar pdeng. Kumta kane ka jingïarai ban ïa kyrshan lang ïa ki kyrtong monlang kan ïarap ban pyndep ïa baroh ki mat kiba dang sah hapoh ka jylla lyngba ka sorkar pdeng. Ka jingïashrut hapoh ki paralok ba ïatreilang dei ban pynbeit noh kham kloi,” ong u Bah MLA ka BJP.
Na ka liang u Bah Shullai u la ong ba ka BJP Meghalaya ka dei ban bud ïa ka Nagaland ha kaba ka NDPP bad ka BJP ki don ka jingïatreilang bad ka la jop palat ïa ka 37 seat. U Bah Shullai u la ong ba kiwei ki seng riewlum ki bym don ki jingïohi jngai kim long eiei hynrei kin long kum ki soh kiba mih ha ki por aïom ki ban shu wan bad leit.