Shillong, Lber 22: “Ko Maduh Prestone wat lada phi kwah ban wan pynïasoh makna bad VPP ruh ngim pdiang te namar ngin pynkhuid noh ïa u stait”, la ong u Bah Ardent Basaïawmoit, President jong ka VPP haba kren ha ka jingïalang ha Mawlangsu.
U Bah Ardent u la ong ïa kane hadien ba u Bah Prestone, u Symbud Myntri Rangbah bad u State President ka NPP u la ong ba lada u lah ban wanrah ne pyni ïa ka blue print halor ka jingieid ïa ka jaitbynriew, u(Prestone) kloi ban pynïasoh noh bad ka VPP.
U nongïalam ka VPP u la ong ba ka Seng kan hikai ïa ki Samla, ki longkmie, ki longkpa ban ïaleh pyrshah ïa ki kam bamsap, ki jingsniew ba bun jait, ka jingleh shiliang khmat da kaba ïaid da ka lynti kaba thymmai bad ki briew kiba thymmai kiba khuid kiba suba.
Shuh shuh ha kane ka jingïalang, u Bah Ardent u pynshai ruh ïa ka jingthaw ktien kiba ïaleh pyrshah ïa u ba u kren beiñ ïa ki Tymmen Basan ba ki sam kiad ha ka por ilekshon. “Nga khlem ong kumta ne kynnoh kumba thaw ktien kine kiba ïaleh pyrshah ïa ngi, hynrei nga shuh ïathuh ïa kaei kaba nga ïoh sngew na kaei kaba ong ki briew bad nga ong ruh ba ka long kaba sngewsih lada ka long kumta”, la ong u Bah Ardent.
