Shen yn shong bishar biang ka sorkar ïa ka jingtei ïa ka skul pule doktor Shillong bad Tura

Shillong, Ïaïong 03: Ka sorkar jylla shen ka sa shong ban bishar biang ïa ka jingthmu ban tei ïa ka jaka pule doktor ha Shillong bad ruh ïa ka Tura medical college kaba la ïaid shakhmat ha ka jingtei ïa ka.
“Ngin sa shong bishar ïa ka jingtei ïa kine ki ar tylli ki jaka pule doktor ha ka jylla la kumno kumno ha ka taiew ba ar ne balai u Ïaïong,” ong ka Myntri ba peit ïa ka tnat Health & Family Welfare ka Kong Ampareen Lyngdoh ha ka jingïakren ha ki lad patahi khubor.
Ka Kong Ampareen ka la ong ba na ka liang jong ka kan ym buhrieh eiei ha kaba ïadei bad ka jingtei ïa ka Shillong Medical College, ‘ka jingeh ka long namar haduh mynta ngim pat lah rai satia hangno ngin pynïeng ïa kane ka jaka pule bad ka dei kane hi ka rai kaba nyngkong tam kaba ngi hap banshim,’ ka la ong.
“Ngin pynthikna ba ka Public-Private Partnership (PPP) formula kaba yn pyntreikam ha Shillong kan dei kaba kynsai bad kaban ai jingmyntoi ïa ka jylla,” ka la ong.
Ha kaba ïadei bad ka Tura Medical College, ka Kong Ampareen ka ong ba ka jingpyntrei ïa kane ka jaka pule doktor ka long kaba i hun.
Lah ba pynkynmaw hangne ba u Myntri Rangbah ka jylla u Conrad K Sangma u la pyntip ba ka sorkar ha kane ka kynti ka la rai ban leit noh sha ka PPP mode na bynta ban tei ïa ka Shillong, Medical College.
Lah ruh ban kdew ba na ka liang u Myntri Rangbah u la pyntip ba ka jingpyntrei ïa ka Tura Medical College ka la ïaid kumba 40%.