Kam u kyrtong NPP ba ka vote sngewsynei kan ym treikam satia ha Sohïong

Shillong, Lber 03 : U kyrtong ka NPP na Sohiong Constituency, Bah Samlin Malngiang ha ka sngi Nyngkong u la kam ba ka vote sngewsynei kan ym treikam satia ïa ka UDP ha kane ka elekshon kaban sa long shen ha ka 10tarik u Jymmang hadien ka jingkhlad noh kyndit u kyrtong ka UDP Bah HDR Lyngdoh khyndiat sngi shwa ban thep vote.
Haba kren bad ki lad pathai khubor hadien ba la kut ka jingïalang jong ka NPP East Khasi Hills, u Bah Samlin u la ong ruh, “Ka vote sngewsynei kan ym treikam than ha Sohiong namar uba khlad um dei u MLA hynrei u dei tang u kyrtong. Kumta ka jingsngewsynei ka don tang ha kato ka por ba jia kumto, ki leit ban sngewlem wat manga ruh nga pyrshang ban leit tangba na ka liang jong ki, kim shah ban wan. Lada nga leit hangto ki lah ban khein vote lang kin ong ba la wan lang hynrei kam dei kumta.”
Nalorkata, u Bah Samlin u la ong ruh ba une u kyrtong ka UDP ba mynta ha u snem 2018 u la kren pyrshah ïa u Bah HDR Lyngdoh. Lah ban kdew hangne ba ka UDP ka la sei da u Bah Synsharkupar Lyngdoh Thabah ba dei u pyrsa jong u Bah HDR ban ïa khun ha kane ka elekshon.
Shuh shuh u Bah Samlin u la kam ruh ba ha kine ki por ba u leit ban ïalap elekshon kylleng ki bun kiba wan na kiwei ki party kynthup na ka UDP kiba wan ban pynïasnoh sha ka NPP. “Ki don ruh katto katne ki nongïalam jong ka UDP kiba leit sha ka sem Congress,” u la bynrap shuh shuh.
Haba pynshai pat halor ka jingkren jong u President ka UDP Bah Metbah Lyngdoh dang shen ha Sohiong ba ka UDP ka khlem leit ban pynïasoh sha ka NPP hynrei ka shu treilang ha ka sorkar, na ka liang u Bah Samlin u la ong, “Ki paidbah mynta ki ong ym donkam shuh ïa kiwei ha Sohiong hynrei ban leit beit beit sha ka NPP kaba ïalam da ka sorkar namar ynda la jop kin wan ban trei lang bad ka NPP.”
Haba pynphai nia pat halor ka jingkren u President ka UDP East Khasi Hills Bah Titos W Chyne ba lada ka UDP ka jop na Sohiong ka sorkar ka lah ban kylla, na ka liang u Bah Samlin u la ong, “Nga kwah ban kylli katno ngut ki don ban pynkylla ïa ka sorkar. Nga ong ba ym dei ban kylla hynrei hadien ka elekshon ha Sohiong ïoh ki shah bret kylla ruh mano ban tip.”
Utei u kyrtong u la ong ruh ba ki paidbah ka jylla ki la dep ban rai ha kane ka elekshon ba la dep ha kaba ki la pynjop haduh 26 ngut ïa ka NPP naba ki ïohi ïa ki mat treikam bad ka jingïalam jong kane ka sorkar da kaba sngap ïa ka sur u paidbah.
U Bah Samlin u la ïathuh ruh ba ha ka por ba don ka jingïalap elekshon shwa ban khlad noh u Bah HDR ka jingkynthoh kaba mih kadei beit tang hapdeng ka UDP bad NPP. “Ka UDP ka shu kynthoh beit ba ka kot Garo kim treh ban pule hynrei katei ka party mynta pat ka leit ban synrop bad ka NPP. Kumta ban ong ba kane ka party kam long ha Sohiong ne ha Khasi jongngi kam don nongrim shuh ïa ki ban ong ba ka NPP kam long namar mynta pat ki wan synrop lang,
U la kam ruh ba ka Sohiong kadei kawei na ki constituency ba ka jingïalap elekshon kadei kaba shongshit tam. “Hynrei na ka liang jongngi, ngi kham ran dien ban kynthoh hynrei ka kham bun ka jingkynthoh na ka UDP. Ki ong ruh ba u Bah Samlin uba biang ban trei hynrei ka party kam long. Hynrei mynta pat haba la thaw ïa ka sorkar, ka UDP kaba kynthoh ïangi ka wan ban treilang bad kane ka sorkar.”
Shuh shuh u ong ruh ba ki paid ka Sohiong mynta ki la ïohi ba ki nongïalam ba kynthoh ïa ka NPP hynrei mynta pat ki ïatrei lang bad ka party NPP ha ka sorkar.