Shillong, Iaiong 03 : Ki Pulit ka East Khasi Hills, kila lap ba dei ka huri hura hapdeng ki ar kynhun kiba la shoh khaw-iang, kaba lam sha ka jingshah pyniap dusmon jong u Bah Omega Myrthong, uba la shah mait ka khlieh bad kti ha ki runar harud jong ka pung Umiam.
Kat kum ka jingpyntip u Superintendent of Police (City) ka East Khasi Hills Bah Vivek Syiem, ki Pulit ka Lumdiengjri Police Station ki la ïoh ban kurup mynta ka sngi sa ïa ka kali Bolero Pik-up kaba pyndonkam ban rahbor ïa u bah Omega na Mawlaingut lem bad ki jaiñ bala bret ha khlaw Nongpathaw.
U Bah Omega Myrthong ula jah rngai nala ïing naduh ka 26 tarik Rymphang bad ïa ka khlieh jong u la lap ha ka 7 tarik Lber narud ka pung Umiam bad shisngi hadien la lap sa ïa ki kti najan kane hi ka pung.
Ki Pulit ka Lumdiengjri Police Station kila ïoh pdiang ïa ka ejahar ba jah rngai, ki la pynlong ïa ka jingtohkit kaba bniah bha bad ha ka 1 tarik Iaiong ki la ithuh ïa ki briew ba pyniap ïa u Bah Omega bad ha kane hi ka sngi ki la ïoh kem ïa lai ngut katba ha ka sngi kaba bud kila kem sa uwei, kaba long 4 ngut baroh lang.
U Bah Vivek u pyntip ba ha ka jingtohkit, kine ki runar ki la phla ba ha ka miet 26 tarik Rymphang, kala don ka huri hura hapdeng ka kynhun jong ki bad jong u Bah Omega Myrthong hadien ka jingïadih kyiad. La ong ba dei ha ka por ba u Bah Omega u dang don ha lynti marwei ban leit shala ïing, kine ki runar kila rahbor bad pyniap ïa u Bah Omega ha Pomlum View Point katba ïa ka met la mait lyngkhot hajan ka rud pung Umiam.
Une u heh Pulit u pyntip ba da ka jingïalam lynti jong kine ki 4 ngut, ki Pulit kila ïoh kurup ïa ka Bolero Pik-up ba pyndonkam ha ka jingrahbor lem bad ïa ki jaiñ ki nep u Bah Omega na ka thain Dewsaw Krang bad khlaw Nongpathaw.
U pyntip ba ka jingtohkit kala ïaid shakhmat bad shen yn sa chargesheet noh ïa kine ki briew.
