Shillong, Ïaïong 03: Ka Seng HYC hapoh ka jingïalam u General Secretary, u Bah Roy Kupar Synrem, mynta ka sngi, ka la khang tala ïa ka ophis treikam jong ka Karuna Trust, ka Kompeni kaba shimwai na ka sorkar Meghalaya ban pynïaid ïa ki 11 tylli ki PHC ha Meghalaya. Kane ka ophis ka don ha Nongthymmai, Shillong.
U Bah Roy Kupar, u la ïathuh ba ka daw ba ka Seng ka la hap ban khang tala ïa kane ka ophis, kadei namar ba la la weng kam kyndit ïa ki 27 ngut ki Auxiliary Nurse and Midwife (ANM) kiba kynthup ïa ki 13 ngut ki Khasi kiba la trei bun bun snem bha kum ki ANM. “Ngi la ïoh jingtip ba ka sorkar ka la aiti beit ha kane ka Trust ban leh ïa kaba donkam bad kiba bun ki la ïoh ïa ka shithi weng kam ba naduh ka 1 tarik mynta u bnai kin nymn lah shuh ban wan trei”, la ong u nongïalam ka HYC, da kaba bynrap ruh ba ka la don ruh ka jingwengkam shuwa kane ruh.
Haba la kylli ïa ka daw balei ba kane ka Trust ka weng kam syndet ïa kine ki ANM, u Roy u la ïathuh ba ka daw kadei namar ba kim don ki Certificate na ka Nursing Council of India (NCI). Hynrei u la ong ba ha por ba ki khot aplikeshon pat kim shym la kdew ba donkam ïa ka Certificate na ka NCI. Hynrei wat la katta ruh ka la dei ban aipor ïa ki ba kin ïoh ïa kine ki Certificate namar ba ka shim por la kumno kumno shi snem ban ïoh ïa kine ki Certificate. Pynban na ka liang kane ka Trust kaba wan kamai na kane ka jylla da ki klur tyngka, ka la shu ai shithi weng kam syndet syndet bad dei namar kane ka daw ba ka Seng ruh ka la hap ban khang tala syndet ïa kane ka ophis. Hynrei u la ong pat ba ka Seng ka kloi ban ïakren pynbeit ba kane ka Trust na ka bynta kine ki ANM ba la shah weng kam.
