Da ka ‘Meghalaya state Network of Positive people & Ahana ban wad bniah ïa ki briew ba don HIV
Khliehriat iaiong 03 : U District Magistrate jong ka East Jaiñtia Hills District, u Abhilash Banarwal, IAS, hadien ba u la ïoh ïa ki kaiphod na ka Antirettroviral Therapy (ART) Centre, ba la pynpaw ba ki la don bun ki briew hapoh ka district kiba la shah ktah ha u khñiang jingpang HIV, u la shim ïa ki lad ki lynti ban ïakhun pyrshah ïa kane ka jingpang, ha kaba u la wanrah ïa kawei ka kynhun, NGO, ka Meghalaya state Netwrk of Positive People & Ahana, ba la lam khmat da u bah Barry Leslie Kharmalki, kum u Programme Manager ha kane ka Project Ahana, ka ba la pynlong ïa ka jingjurip ban wad, ban tih bniah shuh shuh ïa ki briew kiba don ïa u khniang jingpang HIV.
La ong ba ka la shim por lai bnai ïa ki dkhot jong ka NGO ban lap ïa ki briew kiba la shah ktah ha u khñiang jingpang HIV ha East Jaiñtia Hills District, ha kaba la lap ba ki don 231 ngut kiba la ïoh ïa u khñiang HIV, 27 ngut na kine ki la duh noh ïala ka jingim, katba 160 ngut la lah ban pyn kohnguh ïa ki ba kin shim ïa ki jingsumar, ïa kane ka jingïaid lynti jong ka kynhun, la tip ruh kum ka ‘Lost To Follow Up’ (LFU).
U District Magistrate, u la bthah ïa u Programme Manager Project Ahana, ban shim ruh ïa ki lad ban ïada ïa ki longkmie kiba kha khun ban lait na une u khñiang jingpang (Parent to child transmission), kumta la shna ïa ka project ‘Finding the Missing Link’ ha u bnai Nailur 2022.
“Ngi la thung ïa kine ki briew ban wad bniah, da kaba siew bai burom ïa ki bad ki la ïaid kylleng ki jaka bad wad ïa kito kiba la shah ktah ha u khñiang jingpang, don napdeng jong ki kiba la khlad, don ruh kiba ym lah shuh ban shem ïa ki. Nga sngew ba ngin lah beit ban jop ïa kane ka jingïakhun pyrshah ïa ka jingpang HIV tang lada ngi ïoh ïa ka ART Centre kaba biang. Ngi la pyrshang ban shim ruh ka jingïatreilang bad ka Meghalaya State Aids Control Society (MSACS), kumjuh ruh bad ki CHC, ki PHC, ANM, ki ASHA,” ong u Banarwal.
Na ka liang u Programme Manager jong ka Ahana, u Bah Barry Kharmalki u la ong “Ha ka por ba ngi sdang ïa kane ka Mission, Ngi ïakynduh shibun ki jingeh, namar ngim pat don shibun ki jingtip, ngim lah ban ïoh ïa ki jubab kiba biang na ki bor pynïaid shnong. Hynrei kane ka Mission jong nga ka long ruh ban ïathuh ïa kito kiba pang HIV shaphang ka jingim kaba don ka koit ka khiah kumba long ma nga da kaba shim ïa ki lad jingsumar”.