Shillong, Lber 4 : U Myntri Rangbah ka Jylla Conrad K Sangma ha ka sngi Ba-ar ula kular ba ka Sorkar jong u kan wad ïa ki lad ki lad ban pynbeit noh ïa baroh ki jingïakajia pud ha ki hynriew tylli ki jaka ba dang sah teng bad ka Assam ban pynthikna ïa ka jingsuk ba neh shirta ha khappud.
“Ngin sa wad ïa ki lad ki lynti ban pynbeit bad pynthikna ïa ka jingsuk ba neh shirta. Mynta, ngi la dei ïasoi ïa ka Memorandum of Understanding (MoU) bad pynbeit ïa ki hynriew tylli ki jaka ba iakajia” ong u Conrad ha ka jubab ïa ka motion bala wanrah da u MLA ka UDP na Nongpoh Bah Mayralborn Syiem ha ïing Dorbar Thaw Aiñ ka jylla.
Haba pynpaw ba kane ka kam ka dei kaba jyrwit jyrwat bha bad kaba la sahteng da ki phew phew snem mynta , u Myntri Rangbah ula ong ba bun ki Sorkar ha ki snem bala leit kim ju kwah ban ïakren ïa ka kam khappud hynrei dei tang ka Sorkar Meghalaya Democratic Alliance (MDA) kaba la shim ïa ka sienjan ba tyngeh ban ong “To ngin ïakren bad wad ïa ka lynti ban jam shakhmat”.
Haba pyntip ba ka Sorkar kala dep pynbeit ïa ka Tarabari sector (kawei na ki hynriew tylli ki jaka ba ïakajia) haba pynshong nongrim ïa ka jingkwah u paidbah. Ka Sorkar Assam kala kynran dien hadien ba ki Shnong jong kane ka thaiñ kila wan sha Meghalaya.
“Na kata ka daw ba ym don nonghikai satia ha ki skul ha kum kine ki shnong. Ngi la shim ïa katto katne ki sienjam bad ngin sa shim shuh shuh ban leh eiei halor kane ka kam” ong u Myntri Rangbah.
U Myntri Rangbah ula kular ruh ba ka Sorkar kan sa shim ïa ka sienjam ban pynthikna ïa ki jingtei ba donkam kum ka jingpynïasoh surok bad kiwei kiwei ki jingshakri ban ai sha ki paidbah kiba sah ha ki jaka bala dep ban ïapynbeit pud.
Halor ka jingkynnoh ba pyndonkam ka Assam da ka bor, u Myntri Rangbah ula ong ba kane ka dei ka jinglong jingman kaba tasam bha. “Ha kine ki 53 snem kum kine ki jingjia ki la ïai jia na ka por sha ka por. Haba ong ïa kane, kaei kaba kongsan ban shimkhia ka long ka lynti kaba ngi hap ban jam shakhmat bad kaba ngim pat ju ïohi ha ki snem bala leit”.
“Kine ki dei ki jingeh kiba tasam bha hynrei ka dei tang ka jingïakren ba ngin lap ïa ka lynti ban pynbeit” ula ong haba pynpaw ïa ka jingsngewkhia halor ki jingjia ba sngewsih kiba jia ha ki jaka khappud.
Ula kyntu ruh ïa ki dkhot ka ïing Dorbar ba kim dei ban sngew artatien ha ka ban pyntip sha u lada mih kano kano ka jingjia ha khappud bad ong “Phi don ïa ka direct hotline bad nga. Lada mih kano kano ka jing jia ha ka constituency jong phi, ngan dei u briew ba nyngkong ban pynthikna ba ngin lah ban ïada ïa ki briew jong ngi ha khappud”.
Ha kajuh ka por, u Conrad ula kyntu ïa ki dkhot ka ïing Dorbar ba kin pyntip sha u lada don kano kano ka jingpynslem ban shna ïa ki Border Police Outpost, ka ban pynkhlaiñ ïa ka jingdon ki pulit ha ki jaka khappud.
Halor ka jingregister jaka, u Conrad ula ong ba ka Sorkar ka la shimkhia bad shong bishar ïa kane ka kam ha ka lynti kaba dei.
