Kam u Prof Shukla ba la shimti biang ïa ka kam VC ka NEHU na Delhi bitar shla ki Nonghikai

Shillong, Lber 4 : Ka North-Eastern Hill University Teachers’ Association (NEHUTA) ka la pynrem jur ïa ka jingkam u Vice-Chancellor Prof P.S Shukla ba ula shimti biang ïa ka kam kum u Vice Chancellor ka NEHU watla um pat wan trei hadien bun bnai ba u shim Earned Leave.
U Prof Lakhon Kma, President ka NEHUTA bad Dr Marbhador M Khymdeit, General Secretary ka NEHUTA, ki la pynpaw ïa ka jingsngewkhia ïa ka jingkam jong u Prof Shukla ka bym pat ju jia mynno mynno ruh, da kaba ong ba ha ka histori ba 50 snem ka NEHU, um pat ju don mano mano ruh ban shimti ïa ka kam da ka dur khih (virtually) haba dang pep ban wan sha ka headquarter jong ka University ha Shillong.
Ka NEHUTA kala kynnoh ba u Prof Shukla ula pynkheiñ ïa ka NEHU Act, Statued bad Ordinance da kaba pynpaw ba ula shimti biang ïa kam katba u dang leit jingleit.
Kane ka kynrum kynram kala nang jur da ka jingtohkit kaba dang ïaid halor ki jingkynnoh ïa ki jingleh bakla jong u Prof Shukla.
Ka NEHUTA kala kdew ba ka jingshem jong ka jingtohkit ka dei ka ban dang pynmih paidbah bad la bthah ïa u ba un shim da ka shuti tad haduh bala pyndep ïa ka kam.
Kane ka synjuk ki Nonghikai kala buh jingkylli ba kumno u lah ban kam ba ula wan phai sha ka Ophis haba um pat wan shimti mar met ïa ka kam.
Ka NEHUTA ka kynthoh ïa ka jinglong jingman kum ka jingshet kylla ïa ka rukom treikam jong ka University bad ka jingbteng ïa kaei kaba ki batai kum ka por treikam kaba pynjot jong u Prof. Shukla.
Ka synjuk ka ong ba ki rukom pynïaid kam ba bakla jong u ha ki por bala leit kala wanrah ïa ka NEHU sha ka kyrdan ba shatrai eh bad kane ka jingleh jongu ba mynta kan nang wanrah shuh shuh ïa ka jingkulmar bad ki kynrum kynram ba jur.
Lah ban kdew hangne u Vice Chancellor Prof PS Shukla ula shim shuti naduh ka 15 tarik Naiwieng namar ka jingïakhih jong ki samla pule.
Ha ka shithi pan shuti, ula kdew ïa ki daw bym lah kiar, ba ula shim ïa ka earned leave naduh ka 15 tatik Naiwieng bad la pynbud biang da ka shuti naduh ka 17 tarik Naiwieng haduh ka 29 tarik Naiwieng haba pynpaw ruh ba u lah ban pynjlan ïa ka shuti lada donkam.
ïa kam Acting Vice Chancellor la shimti noh da u Professor ba rangbah tam ka skulbah Nirmalendu Saha ban pynïaid ïa kane ka skulbah.