Dang pyrshang ka tnat Pulit ban wad ïa u Bah Kasterbok Kharbuli, ong u Bah Prestone

Shillong, Lber 04: U Symbud Myntri Rangbah ba khmih ïa ka kam pohïing Bah Prestone Tynsong ha ka sngi baar ula ong ba ki Pulit ki la pyrshang katba lah ban wad ïa u Bah Kasterbok Kharbuli, u nongshong shnong ka Sohryngkham, uba la jah naduh u bnai Naiwieng jong u snem ba la dep.
Haba jubabïia ka Call Attention kaba la wanrah da u MLA ka VPP na Mawryngkneng Bah Heaving Stone Kharpran ha ka ïing dorbar thaw aiñ, u Bah Prestone Tynsong, ula ong ha ba ïoh ïa ki jingpyntip ha ka 3 tarik u Naiwieng 2024, ki pulit ka Sohryngkham ki la sdang mardor ïa ka jingtohkit bad kila leit ruh ban pynlong ïa ka jingwad ha kylleng ki jaka.
La ong ba katkum ka jingtohkit kaba la leh mardor, la phah ïa ka khubor peitngor sha baroh ki Officers in-charge bad ki in-charge jong ki Police Station, Outposts bad Beat House ha kylleng ki jaka jong ka jylla Meghalaya bad Assam ban lap dien bad ban bat ïa une u briew uba la jah lada jia ba ki lap ïa u.
U Bah Kharbuli, udei u riewshimet u bym biang ha ka bor pyrkhat pyrdaiñ bad ula jah ha ka por 8:30 mynstep ha ka 1 tarik u Naiwieng 2024.
Ula pyni ba la ai ïa ka notis halor ka jingjah jong u Bah Kharbuli ha ka 11 tarik u Naiwieng bad u Special Superintendent of Police (CID), Meghalaya ula phah ruh ïa katei ka notis sha ki Director General of Police (DGP) ha kylleng ki jylla, ki Commissioners of Police, New Delhi & Chandigarh, Inspector Generals of Police jong ka Lakshadweep, Dadra & Nagar Haveli, Daman & Diu, Ladakh bad ki Superintendents of Police ha baroh ki district jong ka Meghalaya.
“Wat hapdeng ka jingpyrshang ïa kitei baroh, ym shim la lah ban lap ïa u Bah Kasterbok Kharbuli bad ka jingtohkit halor kane ka kam ka dang ïaid shakhmat. Ki jingpyrshang ki dang ïaid shaphrang ban lap ïa une u riewshimet uba la jah klep bad ka jingwad bad ka jingtohkit ruh ka la long da ka jingïatreilang,” ong u Bah Prestone.
“Ka Search and Rescue Team ka la ïatreilang ban leit wad ha kylleng ki jaka, ban lap ïa une u riewshimet bad ki dang buddien ruh ïa ki jinglapksai kiba lah ban ïarap ban tip shaphang ka jingdon ka jong u Kasterbok Kharbuli,” ula ong.