La pynkhreh ïa ka DPR na ka bynta ka surok 4 lane na Umiam sha Shillong, ïathuh u Bah Prestone
Shillong Lber 04: U Symbud Myntri Rangbah ka jylla u uba khmih ïa ka tnat PWD (Roads) u Bah Prestone Tynsong ha ka sngi baar u la pyntip ba ïa ka detailed project report (DPR) na ka bynta ka surok four-lane jong ka Barapani-Shillong road ka la don hapdeng ka jingpynkhreh da ka National Highway Infrastructure Development Council (NHIDCL).
Ïa kane u la ong haba jubab ïa ka jingkylli ha dorbar Mang tyngka, u Bah Tynsong u la ong ba ka DPR bad ka jingsorjamin kaba bniah la dep ban aiti sha ka NHIDCL da ka Ministry of Road Transport & Highways bad ka jingïakren ka dang ïaid ban pyndep ïa kane ka kam kaba la buh ban pyndep ha u Naiwieng 2024.
“Ka jingïakren ka la dang ïaid bad nga thikna ba ïa ka DPR yn sa lah ban pynkhreh shen,” u la ong da kaba bynrap ruh ba ka surok kan wanrah ïa ka jingkiew ha ka ïoh ka kot bad pynsuk ïa ka jingeh jong ki paidbah.
Ïa kane ka mat la wanrah da u MLA ka United Democratic Party (UDP) na Amlarem ba u Myntri barim ka sorkar jylla u Bah Lahkmen Rymbui, uba la kyrpad ïa ka sorkar ba kan bishar biang ïa ka height limit jong ka 2.80 m ha shwa ban shah ban ïaid ki kali kiba kit 9 metric ton lyngba ka jingkieng Umïam.
U Bah Rymbui u la kyntu ruh ïa ka sorkar ba kan khmih ha kaba ïadei bad ka jingkiew ki marbam kaba la ktah ïa ki nongshong shnong na ka daw ba ki kali kit marbam ki hap ban ïaid kumba 80 kilometer ka jingjngai ban poi sha Shillong ha ka jaka jong ka 20 km lyngba ka jingkieng Umïam.
Ha kawei pat ka liang u Bah Tynsong u la ong ba ka jingbuh ïa pud jong ka jingkhia ki kali ka long ban ïada na kano kano ka jingjia kaba sngewsih bad ka jingjulor jong kane ka jingkieng.
U Bah Tynsong u la pyntip ruh ba ïa ka four laning road ne ka surok ban ïaid 4 tylli ki kali kan sdang na ICAR bad kan ïaid sha ka jaka ka MeECL bad kan wan sha industrial estate bad sha kiwei kiwei ki jaka bad ha kaba ïadei bad ka Shillong Western bypass, bad kumjuh ruh ïa kane ka projek ka la dang ïaid.
“Nga pyntip sha phi ba kane ka project kan dep ha ka por ba la buh naba ki kam ki la dang ïaid kumba long haduh kine ki sngi,” u la bynrap.