Shillong, Lber 4: U Myntri ka Tnad Pule Puthi u Rakkam A Sangma ha ka sngi Ba-ar, ula pyntip ha ïing Dorbar ba ka Sorkar ka dang ap ïa ka jingmynjur jong ka All India Council for Technical Education (AICTE) ban ïoh sdang ïa ka jingshim klass jong ha Shillong Government College of Engineering (SGCE), kaba don ha Mawlai Kynton Massar.
Haba jubab ha ka kynta kylli jingkylli, u Rakkam ula pyntip ba ka SGCE kala aplai ha ka 26 tarik Nohprah 2024 ban ïoh ïa ka jingmynjur ka AICTE na ka bynta ban sdang ïa artylli ki technical course-ka Civil Engineering bad ka Electrical Engineering.
Hadien kane, ka AICTE ka la pynlong ïa artylli ki jingïalang bishar ïa ki kot ki sla kaba la long ha ka 22 tarik Kyllalyngkot, 2025 bad ha ka 4 tarik Rymphang 2025.
“Ki stad ki jhad na ka AICTE kila ai jingmut ba ki bor pynïaid ka College ki dei ban pynbiang ïa ki katto katne ki jingtei ba dang duna ïa kiba la shimkhia mynta” ula bynrap.
U Rakkam u pyntip ba ka jingtei ïa ka building ba kynthup ïa ka Academic Block, Administrative Block bad ka hostel ki shynrang bad kynthei jong ka SGCE ka dei kaba la dep ban pyntrei bad la plie ruh ïa ka da u Myntri Rangbah Conrad K Sangma ha ka 16 tarik Kyllalyngkot, 2023.
Nalor kane, ïa ka jingpynpoi um, ring bording bad kiwei kiwei ha SGCE ruh kila biang lut nadong hadong.
U pyntip ba ka Sorkar kala phah ktien ïa ka jingmynjur ban seng ïa ka SGCE bad kala mang ruh haduh 55 tylli ki kam. Kala shah ruh ïa u Additional Director Polytechnic & Shillong Engineering College ba un bat lang ïa ka kam kum u Principal ka SGCE.
“Ka Sorkar kala mynjur ruh ban thung ïa 13 ngut ki nonghikai ka Shillong Polytechnic kiba biang ka kyrdan ba kin hikai hapoh ka Engineering College” ong u Rakkam haba pyntip ba ka North Eastern Hill University (NEHU_ kala ai ka jingmynjur ïa ka jingpynïasoh jong ka SGCE na ka bynta lai snem.
“Kumta, ynda ngi la ïoh ïa ka jingbit na ka AICTE, ngin sa sdang noh ïa ka jingshim klass kham kloi kat kaba lah” ula kular.
