Shillong, Lber 04: Ka Meghalaya Power Distribution Corporation Limited (MePDCL) ka la pynlut haduh T.1.48 Klur na ka bynta ban thied ïa 6 tylli ki kali kiba pyndait ïa ki jingkieng kiba la pynwandur kyrpang na ka bynta ban shna ïa ki waïar elektrik kiba don shajrong bha bad ha kino kino ki jaka.
La ong ba kitei ki kali kin ïarap shibun ha ka ban pynkloi ïa ki kam ki jam ban ai jingshakri bad ban pynduna ïa ka por jong ka jingbym don ïa ka bording elektrik.
Haduh mynta, ka MePDCL ka la pyndonkam da ki kali ki bym don eiei bad ki jingkieng na ka bynta ban pyndiat ïa ki waïar elektrik.
Ha kane ka kynti kaba mynta, kadei ha ka sien kaba nyngkong eh ba ka jylla kan don noh ïa ki kali kiba kyrpang ïa kaba la wanrah da ka MePDCL hapoh ka Meghalaya Power Distribution Sector Improvement Project ïa kaba la bei tyngka da ka Externally Aided Project (EAP) jong ka Asian Development Bank, la pynpaw katei ka tnad ha ka kyrwoh khubor.
Ka jinglut baroh ha katei ka project jong ka ADB ka long T.1225.74 Klur kaba kynthup kham bun ïa ka jingtei ïa ki 24 tylli ki Sub Station kiba thymmai, ka jingsdang pynbha ïa ki 45 tylli ki Sub Station kiba la don lypa, u 617 Ct Km jong u sainar elektrik na ka bynta ka 33 KV, ka jingpynbha ïa ka 295 Ct Km u sainar elektrik jong ka 33 KV uba la don lypa, u 531 Ct Km u sainar elektrik jong ka 11 KV kaba thymmai, ka jingshna pynbha ïa u 188 Ct Km u sainar elektrik jong ka 11 KV kaba la don lypa, ka jingpyndait ïa ki 1.80 lak tylli ki Smart Meter. Ka jingpyntrei ïa kane ka kam baroh ka la kot sha ka 62%.
Ka MePDCL kadei kaba shim halade marwei ïa ka jingkitkhlieh ban pynbiang ïa ka bording kaba biang sha ki paidbah kiba pyndonkam ha ka jylla Meghalaya. Ki don kumba 7,00,000 ki nongpyndonkam ïa ka bording kynthup ïa ki karkhana ki shaniah ha ka MePDCL ba kan ai ïa ka bording kaba baroh 24 kynta.
Ban pynbiang ïa ka bording khlem kano kano ka jingthud ha ka por mynsngi bad mynmiet kadei ka kam kaba khraw ïa ka MePDCL khamtam eh ha ka por ba ka duna um. Ka jingsam ïa ka bording ha ki jaka kiba ïar jong ka jylla bunsien ka la mad ïa ki jingeh ha ka aïom lyiur. Kumta ban leh ïa ki kam maramot bad pynbha ïa ki sainar elektrik ha ka por kaba lyngkot bha ka long kaba eh shibun bad kaba dang dei ban don ki lad jingïarap.
