Shillong, Lber 04: Ka kynhun jong ki 3 ngut ki MLA na South Garo Hills hapoh ka jingïalam u Myntri Sorkar Rakkam A Sangma ha ka sngi Ba-ar, ki la aiti ïa ka dorkhas sha u Myntri Rangbah ka Jylla Conrad K Sangma na ka bynta ban pynpoi ïa ka lynti rel na Guwahati lyngba ka Mendipathar sha Baghmara bad Dhaka, Bangladesh.
Ha ka Dorkhas ki la ong, “Ngi kyntu da ka jingsngewrit bad da ka jingburom ïa ka ophis jong phi ban sngewbha ban shim ïa kane ka kam bad ka tnat Railway ka Sorkar India na ka bynta ban pynrung ha ka National Railway Development Plan ban pynwandur bad pynurlong ïa kane ka projek ka ban pynïasoh da ka lynti Rel shaduh Baghmara.”
U Myntri ka sorkar jylla u Rakkam Sangma u la ong ba kane kan plie lad shisha ïa ka Global Tourism Integration ha kylleng ki Ri kiba don hapoh ka SAARC, BIMSTEC, ASEAN bad ki Ri hapoh ka Indo-Pacific.
“Ka lad pynïasoh kaba biang kan pynkiew ym tang ïa ka jingïatreilang ha ka liang ka ïoh ka kot hynrei kan ïarap ruh ban tei ïa ka jingïadei kaba khlaiñ ha ka kolshor bad ka pule puthi hapdeng ka India bad ka Bangladesh. Ngi ngeit skhem ba kane ka lynti rel ka lah ban long kaba wanrah jingkylla ha ka ban kyntiew ïa ka roi ka par ha ka thaiñ. Ngi ngeit ba phin pyrkhat bha ïa kane ka jingkyrpad bad shim ïa ki sienjam kiba donkam ban sdang ïa ka jingïakren bad ka tnat Railway ka Sorkar Pdeng na ka bynta ban pyntreikam ha ka por kaba biang ïa kane ka projek kaba kongsan,” u la bynrap.
Ka dorkhas ka ong ba ka jingpynïasoh da ka Rel ka lah ban long ka nongkynti kaba kongsan bha ïa ka thaiñ bad kan ai jingmyntoi ym tang ïa ka jylla hynrei ïa ka bynta jong ka thaiñ shatei lammihngi bad ka Ri baroh kawei.
La ong ba ka jingjngai hapdeng ka Baghmara bad ka Mymensing, ka dei kaba jan tam na ka bynta ka jingpynïasoh Rel hapdeng ka Ri India bad ka Ri Bangladesh.
Ka lynti Rel ka don ka jinglah kaba khraw ban pynsuk ïa ka khaïi pateng ha ka pyrthei, ban pynshlur ïa ka kam jngohkai pyrthei, bad ban kyntiew ïa ka jingïasam ïa ka pule puthi hapdeng ki 2 tylli ki Ri.
Shwa ban ïoh ïa ka jinglaitluid, ka India bad Bangladesh ki ïasam ïa ka jingïadei kaba khlaiñ bha ha ka khaïi pateng, khamtam eh lyngba ki rukom ïadie ïathied bad kiwei kiwei ki kam.
