Nongpoh, Lber 04: Wat la ka sorkar Meghalaya ka don ka jingagnud ban wan rah ka surok rel sha ka jylla Meghalaya, hynrei ïa ka pisa ba la mang T. 200 klur ban shna ïa ka surok rel, ka sorkar Meghalaya ka hap ban pynphai noh sha ka sorkar pdeng, kaba dei hadien ka jingbym lah ban pyntreikam ban shna ïa ka surok rel ban pynïasoh sha ka jylla Meghalaya.
Ïa kane ka phang ba ka sorkar ka hap ban pynphai noh ïa katei ka pisa ba T. 200 klur sha ka sorkar pdeng na ka bynta ban wan rah ïa ka surok rel sha ka jylla, ka dei ka jingai jubab u Mytnri rangbah ka jylla u Conrad K. Sangma haba ïarap ban jubab ïa ka jingkylli ba pan jingshai u MLA ka North Shillong Constituency, u Bah Adelbert Nongrum uba la pan jingshai na sorkar halor katei ka mang tyngka kaba T. 200 klur na ka bynta ban wan rah ïa kata ka surok rel sha ka jylla.
Haba jubab mynta ka sngi ïa ka jingkylla halor katei ka mang tyngka ba T. 200 klur na ka bynta ka surok rel, u Myntri ka tnad Transport u Bah Sniawbhalang Dhar bad ruh u Myntri rangbah ka jylla, u Conrad K. Sangma, ki la ïathuh ba ïa katei pisa kaba T. 200 klur la mang ha ka 30 tarik u Lber 2017 da ka sorkar pdeng bad namar ba ym pat lah ban pynurlong ïa kane ka surok rel ka Pisa ka dang don mynta ha ka jingpeit jingkhmih ka bor synshar District ka Ri Bhoi ha ka ophis u deputy commissioner ka Ri Bhoi.
U Myntri Rangbah ka jylla u Conrad K. Sangma bad u Myntri ka tnad Transport u Bah Sniawbhalang Dhar, ki la pynshai ruh ha ka dorbar mang tyngka mynta ka sngi, ba ka sorkar pdeng ka la ai ïa katei ka pisa, ka long ban siew ïa ka bai lutksan jong ki jaka ban thied na ki trai jaka na ka bynta ban shna ïa kata ka surok rel ba pynïasoh sha ka jylla khamtam kaba la sdang na Ri Bhoi District.
“ Ka daw kaba ym lah ban pyntreikam ha kaba shna ïa kane ka surok rel ban pynïasoh sha ka jylla, ka dei ruh na ka jingpyrshah ki paidbah bad ki seng bhalang bad haduh mynta ym pat lah satia ban shim jak ana ka bynta ban pynïaid ïa kane ka surok rel ban pynïasoh sha ka jylla” ong u Myntri ka tnad Transport u Bah Sniawbhalang Dhar.
U Sangma u la pynshai ruh dei namar ka daw ka jingsahteng kane ka surok rel bad kaba ym lah ban pyntreikam haduh mynta, ka sorkar pdeng lyngba ka Northeast Frontier Railway ka Indian Railway ha ka 17 tarik u Nohprah 2024, ka la phah ban pynphai kylla noh ïa katei ka song pisa kaba T. 200 klur.
Ha ka Dorbar Mang Tyngka u Myntri rangbah ka jylla u Conrad K. Sangma u la pynshai ruh halor ka jingkylli, ba wat lada hap ban pynphai noh ïa katei ka song pisa bad ka surok rel ka long shisha kaba donkam ban pynïasoh sha ka jylla ym tang ban kyntiew ïa ka ioh ka kot ka jylla bad kan ïarap ruh ïa ki paidbah ban hiar dor ki marbam mardih ha kaba sorkar ka dang angnud ban wan rah ïa ka surok rel bad ka long pat kaba eh shisha ban wan rah ïa ka surok rel, kaba dei namar ka jingmih bun ka jingpyrshah na ki paidbah hapoh ka jylla, u la bynrap.
Kum ban pynkynmaw, kane ka jingthmu ka sorkar jylla ban wan rah ïa ka surok rel, ka dei kaba la sdang shwa na Ri Bhi District da kaba thmu ban pynïasoh ïa kane ka surok rel na Tetelia na ka jylla Assam bad pynïasoh ha Byrnihat kaba don ka jingjngai kumba 21.50 km na Assam sha Byrnihat ha ka jylla Meghalaya.
