Shen, ong u Symbud Myntri Rangbah halor ka jingkren pynbeit pud ha ka wat kaba ar bad ka Assam

Shillong, Risaw 24 : Ka wat kaba ar jong ki jingïakren pynbeit pud hapdeng ka Meghalaya bad ka Assam, ban pynbeit ïa ki hynriew tylli ki jaka kiba dang sah, kan long shen, la ong u Symbud Myntri Rangbah ba khmih ïa ka tnat Kam Pohiing, u Bah Prestone Tynsong.
“Kan sa long noh shen,” la ong u Bah Prestone haba kylli lano ka Jylla kan bteng biang ïa ka jingïakren pynbeit pud ha ka wat kaba ar bad ka sorkar Assam.
Haba kren bad ki lad pathai khubor, u Symbud Myntri Rangbah u la ong ba ka jingïamynjur lang hapdeng ki ar jylla halor ka tarik kaba biang ban pynlong ïa ka jingleit jurip lang (ka long kaba donkam bha.
“Donkam ban sngewthuh ba ngi donkam ïa ka jingïakren kaba jan bha, ym tang na ka liang jong ngi hynrei na ka liang jong ka Assam ruh. Tang shu ngi ïamynjur lang ban pynlong ïa ka jingleit jurip, lehse lashai, lashai hadien lashai, ne ha kano-kano ka por hapoh une u bnai ne u bnai ban wan, hangta ngan lah ban ïathuh thikna ïa ka tarik ba yn sdang ïa ka jingleit jurip,” u la ong.
Na ka liang u Symbud Myntri Rangbah u la ong ruh ba wat lada ka Jylla ka la long kaba pynkhreh hynrei ki ap lang pat ïa ka Assam ban ïaid shakhmat ïa ka kam.