Pynshlur u Secretary ka NEC ïa ki nongrep ban pynkhlaiñ shuh shuh ïa ka jingthung u shynrai Lakadong

Shillong, Risaw 24: U Secretary ka North Eastern Council (NEC), u Satinder Kumar Bhalla, u la leit biang sha West Jaiñtia Hills distrik ha ka 23/Risaw/2026 na ka bynta ban khmih biang ïa ka jingtreikam jong ka projek ba hap hapoh ka USP, ka Integrated Lakadong Turmeric Value Chain Enhancement Project.
La synran lang ïa une u Secretary da u Dr. Sentitula, IFS, Director (Tourism & Industries), NEC; u Pranjal J. Dutta, Joint Managing Director, Meghalaya State Agricultural Marketing Board, Government of Meghalaya bad ki heh nongtrei jong ki ophis jong ka District Horticulture Officer, District Agriculture Officer bad Meghalaya Basin Management Agency (MBMA).
Ha katei ka jingleit, u Secretary u la leit peit ïa ka jaka ha ka shnong Thadmuthlong C. Phramer na ka bynta ban peit ïa ka jingtei jong ka Centralised Processing Unit. Katba ka kynhun ba wanrah ïa kane ka la pyni ïa ka dur jong ka Curcumin Extraction Plant bad kila pynshai shaphang ka jingtreikam jong ka jingpynkhreh ïa kane. Ka kynhun ka la dep pyntip ba ki engineer ka civil bad ki pulit ka teknikal ba ki dang treikam ïa kane bad ka jinglut jingsep, kaba bud da ka kiwei kiwei ki jingtreikam.
U Secretary u la ïoh ïakren ruh bad ki dkhot jong ka Lakadong Turmeric Cooperative Union Ltd., uba dei u trai jong ka shonshap Geographical Indication (GI) Lakadong Turmeric. Katba ka Union ka la ïaroh ïa u halor ka jingïatreilang bad ka tnad ka rep ka riang bad ka bha ka miat ki nongrep ha kaban buh ïa kane ka projek.
Ki dkhot ruh hangne ki la dep sam ïa la ki jong ki jingshem ha ka jingleit jong ki sha Kandhamal, Bengaluru bad Hyderabad, kiba la shimti ban ïoh ïa ki jingshai kiba shisha halor ki rukom pynmih shynrai, ki kor pynmih umphniang, ki rukom thung kynbat khlem khyndew bad ki lad ban pynïasoh bad ki ïew ki hat.
Ka Union ka la pynpaw ïa ka jingshaniah ban pynpaw pyrthei ba ka Curcumin Extraction Unit kan lah ban pynskhem ïa ka dor ba kham bha kaba wan na ka thaiñ ban sumar bad pynbha shuh shuh ïa ki jait mar, kan ïarap ïa ki nongthung ban ïoh ïa ka dor kaba kham bha na ka bynta u shynrai Lakadong bad kan pynjanai ïa ki lad kamai jakpoh na ka bynta ki nongrep ha baroh kawei ka thaiñ Jaiñtia.
U Secretary u la leit kynduh ïa ka kynhun ba pyntreikam ïa u shynrai Lakadong, ka Shangpung Farmers Union Collective Marketing Centre (CMC) ha Shangpung Pohshnong. Haba u ïakren bad ki dkhot ka CMC bad ki nongrep na ki shnong ba marjan, ki nongrep kila pynpaw ïa ki jingeh kiba ïadei bad ka rep shynrai, khamtam ka jingduna eit masi, bad ki la kwah ïa ka jingïarap ban ïoh masi khnang ban pynbiang ïa kane ka jingdonkam.
U Satinder Kumar u la pynshai ba kum kine ki projek ki hap shabar jong ka jingpeit ka NEC bad ong ba ki nongrep kin ïoh ka jingkyrshan lyngba ka National Dairy Development Board (NDDB), katkum ki kyndon bad ki jingpynbit jong ka skim kaba dei bad kaba ïadei.
Kum shi bynta jong katei ka jingleit jurip, u Secretary u la khmih bha ïa ka rukom treikam ka Bio-curcumin Extraction Unit ba ka pyntrei da ka LIFE Spice Processing Cooperative Society Ltd. ha ka shnong Laskein. Ka unit shen kan sa sdang ïa ka kam sei dawai curcumin, namar ba dang ap ïa ka jingpynsbun ne ka jingmynjur na ka ISO.
Katei ka jingleit jurip ka pynïoh ïa ka lad ban peit ïa ka jingpyntreikam kane ka projek ha katei ka jaka, ban ïajan bad ki kynhun nongrep bad ban pynshongdor ïa kiba donkam ban pyni ha ka jingtei ïa ki kor ki bor pynkylla, ka jinglong ka mar, ka kabu pynïaid ïew bad ka jingpynbha shuh shuh ïa u shynrai Lakadong ha Meghalaya.