Ngi la pynkhreh bha na ka bynta ki elekshon MP sha ka Lok Sabha bad ka GHADC : Bah Prestone

Shillong, Risaw 24 : Ka National People’s Party (NPP) ka la pynkhlaiñ ïa ki jingpynkhreh na ka bynta ka elekshon shiteng samoi sha Lok Sabha bad kumjuh ruh na bynta ka elekshon MDC sha ka Garo Hills Autonomous District Council (GHADC), la ong u President ka NPP ha ka Jylla, u Bah Prestone Tynsong.
Ha ka jingïakren bad ki lad pathai khubor, u President ka Party u la ong ba ka seng ka la bthah ïa ki dkhot jong ka ha baroh ki shnong bad ki thaw ban trei shitom bad leit ïakynduh ïa man la ka longïing hapoh ka Shillong Parliamentary Constituency, ban pynkhlaiñ ïa ki jingpynkhreh na bynta ka elekshon MP shiteng samoi.
Kumban shu kdew hangne, na ka bynta ka elekshon shiteng samoi sha ka Lok Sabha, ka NPP ka la pynieng ïa u Dr. D. R. L. Nonglait kum u kyrtong jong ka seng.
Shuh shuh, u Bah Tynsong u la ïathuh ba ka seng ka la sdang ruh ban pynkhreh na ka bynta ki elekshon MDC ha Garo Hills, kiba lah ban long ha u snem ban wan.
Haba kylli pat halor ka elekshon sha ka Ïingdorbar Thaw Aiñ ka Jylla ha u snem 2028, u Bah Tynsong u la ong ba ka seng kan phai khmat shwa sha kine ki elekshon kiba la jan.
“Ha kane ka por, ngin phai khmat shwa sha ka elekshon shiteng samoi sha ka Lok Sabha bad ki elekshon GHADC. Ynda la dep kine, phi lah ban kylli ïa nga halor ka elekshon 2028,” u la ong.