Shillong, Lber, 03: Ka ophis Meda Infrastructures Private Limited kaba don ha Laitumkhrah ka la shah wiang ding ha ka miet sngi Thohdieng ha ki runar ki bym lah satia ban tip.
Kane ka ophis treikam ka dei kaba khmih ïa ki kam tei jingtei la 12 snem kynthih. Ïa kane ka kompeni la khlieh da ka Kong Anastasia Kharlyngdoh kum ka Board Member bad u Bah Methodius Dkhar uba dang shu jop kum u MLA na Mawshynrut Constituency u la long kum u Director.
Ha kaba ïadei bad kane ka jingjia, ki pulit jong ka tnat Fire and Emergency Services (F&ES) ki la leit mar mar ban tem ïa ka jingpluh jong kane ka ophis.
Ïa ka jingpluh jong kane ka shlem treikam ym pat lah satia ban tip ïa ka daw, hynrei la suba ba kane ka jingshah wiang-ding ka dei na ka jingbitar jong ki paidbah ïa ka jingai jingkyrshan jong u Bah Methodius Dkhar ïa ka party NPP ban thaw ïa ka Sorkar ba thymmai ha kane ka jylla.
