Hato, pynphlop ki MLA u Sing ban long Chief Minister u Bah Ardent?

Babu Kular Khongjirem

0

Katba ka jingïaknieh ban thaw Sorkar ha Meghalaya ka dang thnem bha namarba ka NPP+BJP ka la dawa ban thaw Sorkar, ki kynhun liang pyrshah kiba kynthup ïa ka Congress,TMC bad ki Regional Parties lem bad ki Independent ruh ki la pynkhreh ban leit dawa lem ban thaw Sorkar na u Lat ka Jylla.
Katei ka kynhun pyrshah NPP+BJP kan sa jied ïa uno uno u nongïalam napdeng jong ki u ban un long kum u Chief Minister na kano kano ka party u ban ïalam ïa ka Sorkar synrop kat uba ki kham ïa ibit bad ïa pdiang lang ban ïalam ïa ka Sorkar synrop kaba thymmai.
Napdeng ki nongïalam kiba lah ban long Chief Minister jong ka kynhun pyrshah NPP & BJP, u Bah Ardent Miller Basaïawmoit na ka party VPP u la long lypa iwei uba kham hakhmat eh ban ïalam ïa ka Sorkar kum u Chief Minister ba thymmai ka Sorkar synrop ha Meghalaya.
Jin lada ki ar ngut ki MLA u Sing kim shet kylla, u paidbah ka Bri u Hynñiewtrep Hynniew Wasa un jin da la kmen bad shongshit shisha da ka jingkyrmen ïa ka lawei ba phyrnai na ka bynta ka jingkylla thymmai shisha ka synshar khadar ha kane ka ri jong ngi.
Hynrei,ka jingkhmih lynti ki paidbah ka la kylla pyrdet plak namar ar ngut ki MLA jong u sing (HSPDP) ki la shet kylla bad jah klep khlem da pyntip ne burom shuh wat ïa ki nongïalam jong ka party HSPDP. Nalor ba ki dang jop thymmai, nalor ba ki shah shet bad shah pynbiej ha ka jingthong bad shah khring ba laiphew jait ha ki party heh spah kiba nabar ka jylla kum na Assam bad Delhi na ka bynta ka jingmyntoi jong ki.
Lada ka sorkar bym don ka NPP & BJP ka wan shisha hapoh ka jingïalam jong u Bah Ardent, ka jingangnud ki paidbah ban ïoh ïa ka Sorkar kaba khuid, ka bym shah shiliang bad kaba lait shisha na ka bam sap bam pong. Ki samla khlem kam khlem jam kan urlong shisha namar ka State Reservation Policy kan kylla noh sha 80% ïa ki trai shnong jong ka Meghalaya, kam pher la ki dei ki Khasi-Jaiñtia ne Garo da kaba bishar bad pynshong nongrim katkum ka jingstad bad jinglah ne jingtbit jong ki ïa ka kam.
Lada kane ka urlong, khlem pep ki khun samla jong ngi kin ïohkam sorkar shisha ha manla ki tnad sorkar kum ka tnat Pulit, ka tnat Koit ka Khiah bad ha manla ki tnat sorkar ki samla jong ngi kin ïohkam shisha ha kane ka jylla lajong.
Ym tang kata, ka Iewduh kan kylla long biang ka Iew ba long trai shisha ki Khasi-Jaiñtia bad ka Land Transfer Act, ka aiñ bym shah ban thied jaka ïa ki dkhar ha ri Khasi-Jaiñtia yn pynjanai bad pynkhlaiñ shuh shuh ïa ka hok longtrai ki trai shnong trai muluk.
Ka jingshet kylla ki MLA u Sing ka la wanrah ka jingkthang bad ka jingtim ïa ka lawei ka shynshar khaddar ha ka ri Khasi-Jaiñtia jong ngi. Kumno ki paidbah ki pyrkhat halor kane? Don sengbhalang ne kynhun kum ha ki por mynshwa kiba lum ban lang ïa ki paidbah ban ïa pyrshah lang ïa kane ka sorkar NPP+BJP kaba la pynïaid nadien (remote control) na ki bor kiba nabar ïa ka shynshar ka khadar ha ri jong ngi?
Lada don ba ïalam ki paidbah imat, ki la long kiba kloi ban bud nadien khnang ban ïoh shisha noh da ka Sorkar lajong da ki briew lajong khamtam ha kum kane ka por ba dang khluit bad dang ih bha ka por ban thaw ïa ka sorkar thymmai.
Lada bakla mynta ka taiew, ym lah shuh ban khyllie ne kyndit bynriew hadien kane ka taiew, namar ka la dier ka por. Wat ïa pyrkhat shuh da kumwei shisien ba la lait ka skei na ktem.

Leave A Reply

Your email address will not be published.