Ha ka jingkynjoh sha ka jingshakri ba 25 snem ïa ki paid Pynursla jop don burom u Bah Prestone

Shillong, Lber 03 : Ha ka jingkynjoh artad ïa ka jingshakri ba 25 snem lynter kum u MLA jong ka Pynursla Constituency, ki paidbah ki la pynjop don burom ïa une u nongmihkhmat jongki u bah Prestone Tynsong uba dei ruh u Symbud Myntri Rangbah ka jylla da kaba ula ïoh haduh 13745 vote bad tam haduh 8140 vote ïa ki kyrtong kiba ïaleh pyrshah ïa u khamtam ia u kyrtong ka UDP uba ïoh tang 5377 vote.
Hangne keiñ ka paw kata ka jingong “ ïa u phi lah ban beiñ, ïa u phi lah khoh hynrei ïa u phim lah ban rat noh”. Namar lada phai sha ki social media ka jingshah kynthoh, jingshahbeiñ, jingshah thaw dur bula ba har rukom da ki briew kiba shu bud dien ban wohdong woh daw beit ïa une u nongïalam bad nongmihkhmat paidbah. Hynrei kiwei ki lah ban beiñ ban khoh hynrei ka jingieit kaba ula ïoh na ki paid ka Pynursla ka long kaba ym don ba lah ban pynïakhlad bad na kata ka daw ki pynpaw syndon da ka kam ban pynjop don burom syndon ha kane ka kynti.
Ym lah ruh ban len u bah Prestone Tynsong kumba long mynta u dei uwei na ki nongïalam ba hakhmat duh na ka jaidbynriew Khasi Pnar bad u dei ma u uba ïashan bad ïada ïa ka burom bad iktiar jongka jaidbynriew ha kiba bun ki bynta. Hynrei kaba lyngngoh pat ka long ba kum ka jaidbynriew kam ïohi ïa kata shu lap miet ka ïabeiñ ïakhoh beit. Kane ka long hi ïa baroh na kata ka daw ba ki longshwa man shwa ki ai ïa ka khana pharshi shaphang u Thlen uba bam tang ïa ka snam Khasi Pnar kane ka thew beit ba kum ka jaidbynriew ym ju ïa ailad ïa ki nongïalam ba kin kiew, ki tang shu la kiew la ïatan patlun ba kin hap noh shapoh. Ka jingkhot bad jingkyntu ka long ban kyndit bynriew noh kum ka jaidbynriew ban iehnoh ïakine ki jinglong kiba rim bad shim noh da ki jinglong ba thymmai ban ïatei bad ïa ai mynsiem ïa ki nongïalam kiba shakri ha kano kano ka bynta ruh.