Khihwin ka shnong ka thaw ba leit ai jingkyrshan ki MLA HSPDP ïa ka NPP

Shillong, Lber, 03: Tang katto katne kynta ba ki arngut ki MLA jong ka Hill State Peoples Democratic Party (HSPDP), kata u Bah Methodius Dkhar bad u Bah Shakliar Warjri ki la leit ai jingkyrshan ïa ka NPP ban thaw ïa ka Sorkar ba thymmai hapoh ka Jylla, ka shnong ka thaw ka la khihwin da ki jingbeiñ bad ka jingkynthoh ba laiphew jait ïa kine ki arngut ki nongmihkhmat kiba dang shu jop ha ka sien kaba nyngkong eh na Mawshynrut Constituency bad na Mawthadraishan Constituency.
Ha ka janmiet sngi Thohdieng, ka HSPDP ka la aiti da ka jingthoh sha u Conrad Sangma ba ka HSPDP ka la weng noh ïa ka jingai jingkyrshan jong kine ki arngut ïa ka NPP ban thaw ïa ka Sorkar halor ka nongrim ba ka party kam shym la ai bor ïa ki ban ai jingkyrshan ïa ka NPP.
Kine ki arngut ki MLA jong ka HSPDP ki la jahrngai kynsan ha ka por shiteng sngi na ka jingïalang ba la khot da ka UDP ha kaba la ïadonlang ki MLA jong ka TMC, Congress, VPP, ka PDF bad u MLA Independent ka Rambrai Jyrngam Constituency u Remington G. Momin.
Tang ha ka por jammiet la lap ba kine ki lai ngut ki la leit ai da ka jingthoh ha iingsah jong u Conrad Sangma ban ai jingkyrshan ïa ka NPP ba kan thaw ïa ka Sorkar kaba thymmai ha ka jylla. Tang shu ïoh ïa ka jingkyrshan jong kine ki lai ngut, mar mar u Conrad Sangma u la leit ïakynduh ïa u Lat ka Jylla u Phagu Chauhan ban aiti ïa ka shithi ba la soi da ki 32 ngut ki MLP jong ka NPP, BJP, HSPDP bad arngut ki MLA Independent ban kam thaw sorkar bad ban bam smai noh ha ka 7 tarik mynta u bnai.
Kine ki jingleh lyndet jong kine ki arngut ki MLA ka HSPDP ki la pynbitar lep ïa ki paidbah kiba la kynthoh laiphew jait ïa kine ki arngut ki MLA hapoh ka rynsan jong ka Social Media.
Ka Hynñiewtrep Youths’ Council (HYC) ka la pynbna syndon ban pynlong da ka jingïalang paidbah ha Motphran ha ka sngi Saitjaiñ ban pynrem halor ka jingshet kylla jong u Bah Shakliar Warjri bad u Bah Methodious Dkhar ïa ka jaidbynriew Hynñiewtrep ha kaba kim shym la treh ban ïadon lang bad ki seng Riewlum ban thaw ïa ka Sorkar khlem ka NPP.
“Kan don ruh ka jingthang ïa ki tyngshop jong ki (arngut ki MLA) ha kane ka jingïalang paidbah bad ban dawa ba ki dei ban weng mardor ïa ka shithi ai jingkyrshan jong ki ïa ka seng NPP,” ong u kyrwoh ba la phah da ka HYC sha ki lad pathai khubor.
“Kumta, ngi khot ngi wer ïa baroh ki dkhot jong ka jaidbynriew kiba sngewkhia halor kane ka kam shet kylla jong kine ki arngut ki ingkhong shyllangmat ban ïamih paidbah ha ka por 1:00 baje nohphai sngi ha Motphran,” la wer ka seng.
Ha kajuh ka por u Bah Erwin K. Sutnga uba long u nongïalam jong ka Sur u Paidbah u Hynñiewtrep u la pyntip ba kan kan ka jingïalang ha ophis jong ka Maroda hajan madan Heh Mawlai Phudmawri ha ka por 10:00 baje mynstep ban ïakren ïa ka jingthaw Sorkar trai ri bad ka jingshet kylla jong ki arngut ki MLA ka HSPDP.