Pulom ka jingthmu thaw sorkar ki seng riewlum ryngkat ka Congress bad TMC

Shillong, Lber 03 : Ka jingpyrshang jong ki party riewlum kynthup lang ïa ka Congress bad Trinamool Congress ban thaw ïa ka sorkar ba thymmai khlem ka NPP bad BJP kam shym la poi shaei shaei ruh hadien ba katto katne ngut ki MLA kiba dei ban donlang ha katei ka kynhun kim shym la wanphai biang sha ka jingïalang.
Ha kane ka sngi, jan baroh nongïalam jong ki party bapher bapher kynthup naduh ka UDP kaba don 11 ngut ki MLA, nangta ka Congress bad Trinamool Congress mar san ngut, ka VPP kaba don sawngut, PDF bad HSPDP mar arngut bad ruh arngut ki MLA shimet ki la poi lang sha ka jingïalang kaba long ha iingsah jong u nongïalam ka UDP, Bah Lahkmen Rymbui ha Laitumkhrah.
Pynban, kitei ki nongïalam jong kitei ki party ki la ïathuh ba ha shwa ban sdang ka jingïalang kitei ki MLA ki la mih shwa ban leit donkam hynrei tad haduh ban da wai ka jingïalang kim shym la wanphai shuh.
“Na ka liang ki nongïalam ka party ryngkat bad arngut ki MLA ngi la wan sha kane ka jaka ban kynduh lang ïa baroh ki nongïalam jong kiwei kiwei ki party ban ïatai na ka bynta ban thaw ïa ka sorkar ba thymmai. Hynrei hadien ar ne lai kynta ba ki don hangne ki la leit noh shawei pat bad ngim tip shaei ki don mynta,” ong u President ka HSPDP, Bah KP Pangniang haba kren bad ki lad pathai khubor.
Lah ban kdew hangne ba kitei ki arngut ki MLA jong ka HSPDP ki kynthup ïa u Bah Methodius Dkhar na Mawshynrut bad uwei pat dei u Bah Shakliar Warjri na Mawthadraishan.
Na ka liang u nongïalam ka VPP, Bah Ardent M Basaïawmoit pat u la ong ba katei ka jingkynduh lang jong ki khrui hangtei kadei namar ki kwah ban wanrah ïa ka sorkar kaba khlem ka NPP. Haba kren halor ka jingjah jong ki MLA ka HSPDP, u la ong ba ki sngewsih ban ïoh ba watla ka don ka aiñ kaba khang kyntiap seng hynrei ym shym la burom ïa ka.
Wat na ka liang u nongïalam jong ki MLA ka Congress, Bah RV Lyngdoh ruh u la ïathuh ba kin ïai bteng ban kynduh biang na ka bynta katei ka kam bad ba ki don ruh ïa ka jingbun paid ban thaw ïa ka sorkar ba thymmai.
Shwa kane, u President rangbah ka UDP, Bah Metbah Lyngdoh u la ïathuh ba ki don 31 ngut ki MLA kiba la ai ka jingkyrshan na ka bynta ban thaw ïa ka sorkar ba thymmai. “Kadei ka jingthrang jong baroh ban ïohi ïa ka sorkar ba ïalam da ki party riewlum ba kan wan ha ka jylla,” u la ong da kaba pyntip ruh ba baroh ki party ki la mynjur lang ban pyntyllun beit ïa ka kam shakhmat.
Haba jubab halor ka jingkylli kaba ïadei bad ka jingbym donlang jong kitei ki arngut ki MLA ka HSPDP, u Bah Metbah u la ong, “Kadei ka jingkwah jong ki ngam don ei ei ban ong. Kata kadei ka rai jong uwei pa uwei u dkhot, ki lah ban shim kano kano ka rai ba ki kwah hynrei ha kaba khatduh tang kiba wan bad kiba don bad ngi, tang kata nga lah ban ong.”
Nalorkata, u ong ruh ba kitei ki MLA ka HSPDP ki khlem pynpaw kano kano ka jingpyrshah ba kim sngew tynnad ban ïatrei lang bad ka Congress lane bad ka TMC.
U ong ruh ba ka UDP ka long kaba kloi wat ban shong ha ka Liang Pyrshah lada kim ïoh ïa ka jingbun paid bad ïa kane ruh kin sa shong biang kum ka party shwa ban shim ïa ka rai.
Shwa kane haba jubab halor ka jingkylli, u la ïathuh ba kam dei satia ka jingkwah ne ka rai ba kin leit ne ym leit treilang bad ka NPP hynrei kaba hakhmat hi kadei ba kito kiba kwah ban donlang kawei ki la pynpaw ïa ka jingkwah ban don lang.