Ngam bynñiaw lada ïoh CM Khasi bad lada ngi thaw sorkar u CM un dei na ka UDP : Mukul
Shillong, Lber 03: U Parliamentary Party Leader jong ka AITC u Dr Mukul Sangma ha ka sngi Thohdieng u la ong ba na ka liang jong um don kano kano ka jingsngew pyrshah lada ka wan Myntri Rangbah napdeng ki Khasi bad ba kat kum ka jingdon ki MLA lada dei ba thaw ïa ka sorkar bym don NPP bad BJP ka UDP ka dei hok ban ïoh ïa u Myntri Rangbah.
Haba kren sha ki lad pathai khubor hadien ka jingïalang jong baroh ki seng saiñ pyrthei bymdei na ka NPP bad BJP u Dr Mukul u ong ba ka jingïalang hi ka long da kawei ka sur ka rai ban tylli mlon ban long ka bor kaban lah ban ïakhun pyrshah ïa ka NPP bad BJP bad ruh ban ïa phylliew jingmut hapdeng ki party bym dei na kine ki ar party.
“Lada phi peit kaei kaba la jia ha kine ki san snem kiba la leit ki kam kiba kane ka sorkar ka la leh ka la wanrah ïa ka jingkordit kaba khraw ïa ki paidbah ka jylla bad ka jingbym pynjop ïa ka NPP haduh ban da ïoh thaw sorkar ruh lehse lah ban ong ba dei ba kim kwah shuh ban dang shah synshar ha ka,” u la ong.
“ka thong ruh ka dei ban ïatrei lang na bynta ka bha ka miat u paidbah bad ka roi ka kiew jong u ym shuh ban ailad ïa kine ki party kiba la pynhiar shatrai ïa ka jylla haduh ban da ïoh ïa ka nam kaba nyngkong eh kum ka jylla bamsap,” u la bynrap.
Haba kylli lada kine ki party bym dei NPP bad BJP ki lah ban thaw sorkar u don jingsngew pyrshah ne em ïa ka jingshimti da ki Khasi ban longMyntri Rangbah, “Ngim ju don ka jingsngew pher lada u Khasi u shimti ïa kane ka kyrdan ruh namar ha kine ki snem kiba la leit ngi ïohi ba u Bah BB Lyngdoh, u Bah EK Mawlong bad kiwei pat ki la shimti ïa kane ka kyrdan na kata ka daw ngam don jingsngew khohñioh lada dei ba u CM un dei na pdeng ki Khasi ruh,” jubab u Dr Mukul.
Haba jubab pat mano napdeng kine ki party ban ïoh sei ïa u Myntri Rangbah u Dr Mukul u la ong ba ka party kaba la ïoh bun tam ki MLA ka dei kata hi ka party kaban sei ïa u Myntri Rangbah.
“Na ki nombor phi la ïohi ba dei ka UDP kaba la jop bun eh ki MLA bad ka dei maka hi ban ïoh Myntri Rangbah lada dei ba ngi lah ban thaw sorkar,” ong u Dr Mukul.